რუსეთის საგარეო საქმეთა მინისტრი, სერგეი ლავროვი ამბობს, რომ გაეროში საქართველოს საგარეო საქმეთა მინისტრთან შეხვედრა თავად მინისტრმა ითხოვა. ლავროვის კომენტარს რუსული გამოცემა TASS ავრცელებს.

ლავროვი აცხადებს, რომ შეხვედრაზე დავით ზალკალიანი დაინტერესდა, როდის აღდგებოდა რუსეთ-საქართველოს შორის ავიამიმოსვლა, რაზეც ლავროვის თქმით, მან უპასუხა, რომ ეს დროებითი ღონისძიებაა და სიტუაციის ნორმალიზების შემთხვევაში ფრენები აღდგება.

ნიუ იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.

25 სექტემბერს ლავროვმა საქართველოსთან ავიამიმოსვლის აღდგენის სურვილი გამოთქვა. მისი თქმით, ამის მიზეზი ისაა, რომ "საქართველოში უმრავლესობამ მართლმადიდებლობის საპარლამენტო ასამბლეაზე რუსეთის წინააღმდეგ პროვოკაციის კონტრპროდუქტიულობა გააცნობიერა".