სასჯელაღსრულებისა და პრობაციის ყოფილი მინისტრი და ქართული ოცნების ყოფილი წევრი კახა კახიშვილი ექიმ მაია კოხტაშვილის საქმეს ეხმაურება.

კახიშვილის შეფასებით, დარღვევებზე მსგავსმა სამართლებრივმა რეაგირებამ და "ასეთი მეთოდებით ბრძოლამ" არ უნდა "მიგვიყვანოს იქამდე, რომ ექიმებს ავადმყოფის დახმარების შეეშინდეთ". ყოფილი მაღალჩინოსანი წერს, რომ უწყებამ ხელოვნურად არ უნდა შექმნას გარემოება, რათა სამართალდარღვევა გამოავლინოს.

"კანონი კანონია და მისი დაცვა ყველას გვევალება, მათ შორის ექიმსაც. თუ კანონი დაირღვა, ამას შესაბამისი სამართლებრივი შეფასება უნდა მოჰყვეს. მაგრამ ჩემთვის მეორე საკითხიც არანაკლებ მნიშვნელოვანია. რამდენად სწორია, როდესაც ადამიანს სპეციალურად აგზავნი ექიმთან, ის უყვება მძიმე მდგომარეობაში მყოფ ავადმყოფზე, სთხოვს დახმარებას და შემდეგ ექიმის სურვილი, დაეხმაროს პაციენტს, მისი სისხლისსამართლებრივი დევნის საფუძველი ხდება. შეიძლება ვინმემ თქვას, რომ ეს პირველი შემთხვევა არ იყო. თუ შესაბამის ორგანოებს ჰქონდათ ინფორმაცია, რომ ექიმი ამას სისტემატურად აკეთებდა ან მანამდეც არღვევდა კანონს, მაშინ სწორედ ეს უნდა შეესწავლათ, დაკვირვებოდნენ მის საქმიანობას, მოეპოვებინათ შესაბამისი მტკიცებულებები და საქმე რეალურ ფაქტებზე აეგოთ. რა თქმა უნდა, მნიშვნელობა აქვს იმასაც, კონკრეტულად რა პრეპარატზეა საუბარი, რა რაოდენობა გამოიწერა და რა გარემოებებში მოხდა ეს ყველაფერი. ეს ძალიან რთული და ფაქიზი საკითხია. ერთი მხრივ, სახელმწიფომ აუცილებლად უნდა ებრძოლოს ნარკომანიას და ნარკოტიკების უკანონო ბრუნვას, მაგრამ, მეორე მხრივ, ერთმანეთისგან უნდა გავარჩიოთ ნარკოდილერი და ადამიანი, რომელსაც ნარკოტიკებთან არანაირი კავშირი არ აქვს და წამალს მძიმე მდგომარეობაში მყოფი ახლობლისთვის, ტკივილის შესამსუბუქებლად ან სხვა რეალური საჭიროების გამო ეძებს. კანონის დაცვა აუცილებელია, მაგრამ დარღვევასთან ასეთი მეთოდებით ბრძოლამ არ უნდა მიგვიყვანოს იქამდე, რომ ექიმებს ავადმყოფის დახმარების შეეშინდეთ. თუ დარღვევა რეალურად და სისტემატურად ხდება, ის უნდა გამოავლინო და დაამტკიცო, მაგრამ ხელოვნურად არ უნდა შექმნა ისეთი სიტუაცია, რომელიც საბოლოოდ თავად ხდება ადამიანის დასჯის საფუძველი. იმედი მაქვს, სასამართლოში საქმის არსებითი განხილვისას საქმის ყველა გარემოება სრულად გაირკვევა და ამ კითხვებსაც გაეცემა პასუხი," — წერს კახიშვილი.

მაია კოხტაშვილის საქმე

11 სექტემბერს ახმეტაში ნევროლოგი მაია კოხტაშვილი დააკავეს. ფინანსთა სამინისტროს საგამოძიებო სამსახური ექიმს ფსიქოტროპული პრეპარატის რეცეპტის უკანონოდ გამოწერას ედავებოდა.

უწყების განცხადებით, "დადგინდა, რომ კახეთის რეგიონში, სამედიცინო დაწესებულებაში დასაქმებულმა ექიმმა, სამსახურებრივი მდგომარეობის გამოყენებით, მოქალაქეს ფსიქოტროპული ნივთიერების შესაძენად უკანონოდ დაუმზადა და გასცა ყალბი რეცეპტი".

კოხტაშვილის წინააღმდეგ გამოძიება სისხლის სამართლის კოდექსის 268-ე მუხლის მე-2 ნაწილით დაიწყო, რაც სასჯელის სახით 3-დან 6 წლამდე ვადით თავისუფლების აღკვეთას ან ჯარიმას ითვალისწინებს.

ადგილობრივების ვერსიით, ექიმს პროვოკაცია მოუწყვეს. გავრცელებული ცნობებით, კოხტაშვილთან მივიდა ადამიანი, რომელმაც ლოგინად ჩავარდნილი და ტკივილით გატანჯული ოჯახის წევრისთვის ფსიქოტროპული პრეპარატის გამოწერა სთხოვა.

"მთის ამბების" დამფუძნებლისა და რედაქტორის, გელა მთივლიშვილის ცნობით, კოხტაშვილთან "აგენტი-პროვოკატორი მიაგზავნეს. აგენტმა თავი შეაცოდა. უთხრა, რომ დედა ჰყავდა ლოგინად ჩავარდნილი და წამალი გამოაწერინა". მთივლიშვილის განცხადებით, აღნიშნული პიროვნება ფინანსთა სამინისტროს საგამოძიებო სამსახურის კახეთის სამმართველოს თანამშრომელია.

"ქართული ოცნების ხელისუფლების მიერ დადგენილი რეგულაციების თანახმად, ექიმმა ფსიქოტროპულ მედიკამენტზე რეცეპტი სრულწლოვნებს ყოველ 14 დღეში ერთხელ უნდა გამოუწეროს. ამის გამო ფსიქიკური ან მძიმე ნევროლოგიური დარღვევების მქონე პაციენტებს, განსაკუთრებით მათ, ვინც სოფლად ცხოვრობენ ან სათანადო დამხმარე არ ჰყავთ, უამრავი პრობლემა ექმნებათ.

ექიმს ედავებიან, რომ რეგულაციის დარღვევით რეცეპტი არ უნდა გამოეწერა, მაგრამ როცა საქმე ამ ქმედების სისხლის სამართლის დანაშაულად დაკვალიფიცირებასა და ადამიანის დაკავებას ეხება, პირველ რიგში ყურადღება იმაზე უნდა გავამახვილოთ, რომ საგამოძიებო სამსახურმა დანაშაული თავად შექმნა!" — წერს მთივლიშვილი.

საქმის პროკურორი, მანანა თანდაშვილი უარყოფს ექიმის პროვოცირებას და საგამოძიებო მოქმედებების ჩატარებას სასამართლო განჩინებით ხსნის.

"საგამოძიებო უწყების თანამშრომელი მოქმედებდა სასამართლო განჩინების, სასამართლოს ნებართვის საფუძველზე... მიმდინარე გამოძიების პროცესში, მტკიცებულებათა გამოკვლევის ეტაპზე, მიღებულ იქნა სასამართლოს ნებართვა ფარული საგამოძიებო მოქმედებების ჩატარების შესახებ," — ამბობს პროკურორი.

12 სექტემბერს თელავის რაიონულმა სასამართლომ ექიმს 50 000-ლარიანი საპატიმრო გირაო შეუფარდა. მოქალაქეებმა აღნიშნული თანხა ერთ საათში შეაგროვეს.

"ახმეტაში, ბანკომატებთან ხალხის რიგი მდგარა, რომ დედასთვის გირაოს თანხა ჩარიცხონ. ვეძებ სიტყვებს მადლიერებისთვის, მაგრამ ვერ ვპოულობ, რადგან არ არსებობს. მაია კოხტაშვილი, რა გაეცი ასეთი," — წერს ექიმის შვილი, ანა იმედაშვილი.

სოციალურ ქსელში გავრცელდა ვარაუდი, რომ მაია კოხტაშვილს პროვოკაცია მისი ოჯახის წევრების პოლიტიკური შეხედულებების გამო მოუწყვეს. კერძოდ, კოხტაშვილის შვილები პროევროპული აქციების აქტიური მონაწილეები არიან.