დე ფაქტო სამხრეთ ოსეთის სასამართლომ ახალგორელი აქტივისტი თამარა მეარაყიშვილი ყველა წარდგენილ ბრალდებაში უდანაშაულოდ ცნო. ეს მესამე შემთხვევაა, როცა მეარაყიშვილმა დე-ფაქტო პროკურატურას საქმე მოუგო.

დე ფაქტო პროკურატურამ სასამართლოს მეარაყიშვილის წინააღმდეგ 3 საქმით მიმართა. აქედან ერთ-ერთით აქტივისტს ბრალს დებდნენ დე ფაქტო პრეზიდენტის პარტიის, ეძინაია ოსეტიას ცილისწამებაზე. ასევე, ყალბი დოკუმენტების დამზადებაზე. სასამართლოს ქვედა ინსტანციამ მეარაყიშვილი უდანაშაულოდ ცნო და ყველა ბრალდება მოუხსნა. თუმცა, დე ფაქტო პროკურატურამ გადაწყვეტილება უზენაესში გაასაჩივრა.

თამარა მეარაყიშვილის საქმე

მეარაყიშვილი 2017 წლის 16 აგვისტოს დააკავეს დე ფაქტო სამხრეთ ოსეთის მმართველი პოლიტიკური პარტიის ედინაია ოსეტიას მიმართ ცილისწამების ბრალდებით. მას შემდეგ ოთხი სასამართლო პროცესი ჩატარდა ცხინვალში, ბრალდებულის სახლი არაერთგზის გაიჩხრიკა, არაერთი დაკითხვა ჩატარდა, თუმცა გამოძიებამ მაინც ვერ შეძლო საკმარისი მტკიცებულების მოპოვება იმის დასამტკიცებლად, რომ მეარაყიშვილი დამნაშავეა.

სამხრეთ ოსეთის დე ფაქტო რესპუბლიკის პროკურატურამ რიგით მეორე სისხლის სამართლის საქმე მარტში აღძრა. საქმე აღიძრა მუხლით, რომელიც ოფიციალური დოკუმენტების, ჯილდოების, ბეჭდის, შტამპის, ბლანკის გაყალბებას ითვალისწინებს. პროკურატურა მას დე ფაქტო სამხრეთ ოსეთის მოქალაქის ყალბი პასპორტის დამზადებას ედავებოდა.

თამარას ყველანაირი დოკუმენტი ქონდა ჩამორთმეული და გადაადგილების უფლება შეზღუდული. მთელ დროს ის ახალგორში, საკუთარ სახლში ატარებდა და გარეთ გასვლას მხოლოდ სასამართლო პროცესზე ან დაკითხვაზე წასვლის შემთხვევაში ახერხებდა, ისიც ადვოკატის თანხლებით.