საქართველოს აეროპორტების გაერთიანების ინფორმაციით, 15 ივლისიდან თბილისსა და შანხაის შორის პირდაპირი რეგულარული ავიამიმოსვლა ამოქმედდება.

ახალ მიმართულებაზე ფრენებს ჩინური ავიაკომპანია China Eastern Airlines კვირაში 3-ჯერ — ყოველ ოთხშაბათს, პარასკევსა და კვირას შეასრულებს. ეს არის რიგით მესამე ჩინური ავიაგადამყვანი, რომელიც საქართველოს ბაზარზე პირდაპირი რეგულარული რეისებით ოპერირებას იწყებს.

აეროპორტების გაერთიანებაში განმარტავენ, რომ შანხაის მიმართულების დამატება მნიშვნელოვნად შეუწყობს ხელს ორ ქვეყანას შორის ტურიზმის, ბიზნესისა და სავაჭრო-ეკონომიკური ურთიერთობების გაძლიერებას. არსებულ უვიზო რეჟიმთან ერთად კი, ახალი პირდაპირი ავიამიმოსვლა მგზავრობას ორმხრივად კიდევ უფრო კომფორტულსა და ხელმისაწვდომს გახდის.

ავიაბილეთების შეძენა უკვე შესაძლებელია ავიაკომპანიის ოფიციალურ ვებგვერდზე.