პარლამენტის იურიდიულ საკითხთა კომიტეტის თავმჯდომარე, არჩილ გორდულაძე საქართველოში ეუთო-ს კრიტიკულ რეზოლუციას გამოეხმაურა. მისი შეფასებით, აღნიშნული თავდასხმები ყოველგვარ სამართლებრივ საფუძველსა და არგუმენტსაა მოკლებული.

გორდულაძის განცხადებით, ქვეყანაზე მსგავსი ზეწოლის ერთადერთი რეალური მიზეზი ის არის, რომ საქართველო გარე ძალების მითითებებს არ ასრულებს და საკუთარ სუვერენიტეტს იცავს.

"ეუთო ერთ-ერთი ბოლო ბასტიონი იყო, სადაც გლობალური ომის პარტიის გავლენები არ ვრცელდებოდა, მაგრამ, როგორც ჩანს, ისიც დაეცა და საქართველოს წინააღმდეგ მისი თავდასხმები ვიხილეთ.

ბუნებაში საფუძველი და სამართლებრივი არგუმენტი არ არსებობს, რის გამოც შეიძლება, თავს ესხმოდნენ ქართულ საზოგადოებას, ერთის გარდა, რომ საქართველო გლობალური ომის პარტიის მითითებებსა და დავალებებს არ ასრულებს და არ იქცევა, როგორც პროქსი სახელმწიფო. ჩვენს ქვეყანაში გარე მმართველობა არ არის დამყარებული ("პირველი არხი")", — თქვა გორდულაძემ.

შეგახსენებთ, რომ 8 ივლისს საქართველოს დელეგაციამ უარი თქვა ეუთო-ს საპარლამენტო ასამბლეაზე გამართულ კენჭისყრაში მონაწილეობაზე, სადაც საქართველოს საკითხზე კრიტიკული რეზოლუცია მიიღეს. მათ სხდომა პროტესტის ნიშნად დატოვეს.

პარლამენტის საგარეო ურთიერთობათა კომიტეტის თავმჯდომარის ნიკოლოზ სამხარაძის განცხადებით, დეკლარაციის შესწორებული ვერსიის ცალკეული ნაწილები განზრახ ამახინჯებს საქართველოში არსებულ პოლიტიკურ რეალობას.