თბილისის სააპელაციო სასამართლომ გააუქმა საქალაქო სასამართლოს გადაწყვეტილება და არასრულწლოვანზე მოძალადე პოლიციელი დამნაშავედ ცნო. ინფორმაციას არასამთავრობო ორგანიზაცია "საფარი" ავრცელებს, რომლის იურისტიც დაზარალებული გოგონას ინტერესებს იცავდა.

მათი ცნობით, საქმე ეხებოდა სამართალდამცველის მხრიდან ბავშვის სისტემატურ დევნას, არასასურველ ფიზიკურ კონტაქტსა და ონლაინ კომუნიკაციას, რამაც არასრულწლოვანს მძიმე ფსიქოლოგიური ტანჯვა მიაყენა. საქმის გამოძიებაში მნიშვნელოვანი როლი ითამაშეს ბავშვის მეგობრებმა და მასწავლებელმა, რომლებმაც საგამოძიებო უწყებებს სრული ინფორმაცია მიაწოდეს.

"დღეს თბილისის სააპელაციო სასამართლომ შეცვალა პირველი ინსტანციის გადაწყვეტილება, პატიმრობიდან გათავისუფლებული, ბავშვზე მოძალადე პოლიციელი დამნაშავედ ცნო.

საქმე ეხება პოლიციელის მხრიდან არასრულწლოვანი გოგონას მუდმივ დევნას და არასასურველ კომუნიკაციას როგორც ფიზიკურ, ისე ონლაინ სივრცეში, გოგონას ნების საწინააღმდეგოდ შეხებას გოგონას სხეულის სხვადასხვა ნაწილზე. მოძალადისთვის ცნობილი იყო დაზარალებულის ასაკი, თუმცა მასთან კონტაქტს მაინც ინტენსიურად ცდილობდა. მისი ამ ქმედებების შედეგად ბავშვმა მძიმე ფსიქოლოგიური ტანჯვა განიცადა, აღარ გადაადგილდებოდა იმ სივრცეებში, სადაც შეიძლებოდა მოძალადეს შეხვედროდა. ბავშვის ეს გამოცდილება ცნობილი იყო მისი მეგობრებისა და მასწავლებლისთვის, რომლებმაც, ასევე, სრული ინფორმაცია მიაწოდეს გამოძიებას.

საქმეს აწარმოებდა საფარის იურისტი მარი ვარამაშვილი. მისი მონაწილეობით ჩატარდა ყველა საჭირო საგამოძიებო და საპროცესო მოქმედება", — აღნიშნულია ორგანიზაციიის განცხადებაში.