დიდი ბრიტანეთი უკრაინისთვის ევროკავშირის 90 მილიარდი ევროს დახმარების პროგრამას შეუერთდა. ევროკომისიის მიერ გავრცელებულ განცხადებაში ვკითხულობთ, რომ "ევროკავშირი და გაერთიანებული სამეფო მტკიცედ უჭერენ მხარს უკრაინას და ადასტურებენ მზადყოფნას, დაეხმარონ ქვეყანას მანამ, სანამ ეს საჭირო იქნება რუსეთის უკანონო, აგრესიული ომის დასასრულებლად და ყოვლისმომცველი, სამართლიანი და ხანგრძლივი მშვიდობის დასამყარებლად".

ევროკომისიის განცხადებით, ივნისში უკვე გამოიყო 7.1 მილიარდი ევრო, საიდანაც 3.2 მილიარდი ევრო საბიუჯეტო მხარდაჭერას მოხმარდა, ხოლო თითქმის 3.9 მილიარდი ევრო — თავდაცვას.

"დღეს ჩვენ მივესალმებით ხელშეკრულების გაფორმებას, რომლითაც დასრულდა მოლაპარაკებები გაერთიანებული სამეფოს მონაწილეობაზე უკრაინის მხარდაჭერის 90 მილიარდი ევროს მოცულობის სესხის პროგრამაში.

ეს მნიშვნელოვანი ნაბიჯია გაერთიანებული სამეფოს ჩართვისკენ, რაც უკრაინას საშუალებას მისცემს, აღნიშნული სესხის ფარგლებში, თავდაცვის სფეროს მწარმოებელთა უფრო ფართო წრიდან შეიძინოს საჭირო აღჭურვილობა და უზრუნველყოს რუსული აგრესიის მოსაგერიებლად აუცილებელი შესაძლებლობების ქონა. გაერთიანებული სამეფო სამართლიან და პროპორციულ წვლილს შეიტანს სესხთან დაკავშირებული ხარჯების დაფარვაში, ბრიტანულ კომპანიებთან გაფორმებული კონტრაქტების ღირებულების შესაბამისად.

ეს სესხი უკრაინას მომდევნო ორი წლის განმავლობაში უზრუნველყოფს პროგნოზირებადი ფინანსური მხარდაჭერით, რაც მას როგორც ბიუჯეტის, ისე თავდაცვის ხარჯებისთვის სჭირდება. ივნისში უკვე გამოიყო 7.1 მილიარდი ევრო, საიდანაც 3.2 მილიარდი ევრო საბიუჯეტო მხარდაჭერას მოხმარდა, ხოლო თითქმის 3.9 მილიარდი ევრო — თავდაცვას. თავდაცვის მიზნობრიობით მორიგი ტრანშის გადარიცხვა ამ კვირაში იგეგმება.

ევროკავშირი და გაერთიანებული სამეფო ერთხმად მიიჩნევენ დღევანდელ შეთანხმებას უკრაინის მიმართ მათი საერთო ერთგულების დასტურად, რაც ასევე ხაზს უსვამს კავშირისა და გაერთიანებული სამეფოს თავდაცვით-სამრეწველო ბაზების მჭიდრო ურთიერთკავშირსა და ურთიერთდამოკიდებულებას.

ჩვენ კვლავაც მჭიდროდ ვთანამშრომლობთ საერთაშორისო პარტნიორებთან უკრაინის მდგრადობის გასაძლიერებლად, მისი ეკონომიკის მხარდასაჭერად და ქვეყნის როგორც მიმდინარე, ისე გრძელვადიანი საჭიროებების დასაკმაყოფილებლად.

ევროპის უსაფრთხოება ყველაზე მტკიცე მაშინ არის, როდესაც მოკავშირეები ერთად დგანან. უკრაინის მხარდაჭერის სესხი ასევე წარმოადგენს სასიცოცხლოდ მნიშვნელოვან ინვესტიციას ევროპის უსაფრთხოებაში — ძლიერი, სუვერენული და უსაფრთხო უკრაინა აუცილებელია მთლიანად ევროპის უსაფრთხოებისა და სტაბილურობისთვის, ისევე როგორც მომავალი აგრესიის შესაკავებლად," — ვკითხულობთ განცხადებაში.