13 ივლისს ევროკავშირის საბჭომ სანქციები დაუწესა 15 ფიზიკური პირა, რომლებიც პასუხისმგებელნი არიან ადამიანის უფლებების უხეშ დარღვევებზე. საქმე ეხება უკრაინის ოკუპირებულ ტერიტორიებსა და რუსეთში უკრაინელი სამხედრო მოსამსახურეებისა და სამოქალაქო დაკავებულების მიმართ გამოვლენილ სასტიკ მოპყრობას. ინფორმაციას უკრაინული მედია ავრცელებს.

სანქციები მიღებულია ევროკავშირის ადამიანის უფლებათა გლობალური სანქციების რეჟიმის ფარგლებში, რომელიც 2020 წლის დეკემბერში შეიქმნა.

დასანქცირებულ პირებს შორის არის დონეცკის ოლქის ქალაქ ოლენივკის ციხის უფროსის პირველი მოადგილე. იგი პირდაპირ პასუხისმგებლად მიიჩნევა 2022 წლის 28-29 ივლისს იქ მძიმედ დაჭრილთა ევაკუაციის განზრახ გაჭიანურების გზით უკრაინელი სამხედრო ტყვეების მასობრივ მკვლელობაზე, ასევე უკრაინელი ტყვეების სისტემატურ წამებასა და დამცირებაზე. შეზღუდვები ასევე შეეხო ოლენივკის ციხის ადმინისტრაციის კიდევ რამდენიმე მაღალჩინოსანს.

ალექსეი ხავეცკი — რუსეთის ქალაქ პაკინოს მე-7 გამასწორებელი კოლონიის უსაფრთხოების სამსახურის უფროსი, რომელიც აღნიშნულ დაწესებულებაში უკრაინელი ტყვეების სისტემატური წამებისა და შეურაცხყოფის ორგანიზატორად მიიჩნევა;

იან ზანევსკი — რუსეთის ფედერალური უსაფრთხოების სამსახურის (FSB) ოფიცერი, რომელიც დაკავშირებულია ოკუპაციის დროს ხერსონის, მიკოლაევისა და ზაპოროჟიეს ოლქებში უკრაინელი მშვიდობიანი მოქალაქეების თვითნებურ დაკავებებსა და წამებასთან.

დასანქცირებულ სასჯელაღსრულების დაწესებულებებს შორის მოხვდა ტაგანროგის მე-2 საგამოძიებო იზოლატორი, სადაც სხვა პატიმრებთან ერთად წამებით მოკლეს უკრაინელი ჟურნალისტი ვიქტორია როშჩინა.

კიდევ შვიდ პირს სანქციები რუსეთში მყოფი უკრაინელი ტყვეების მიმართ სასტიკი მოპყრობის გამო დაუწესდა. მათ შორის არიან:

  • ალექსანდრ გნუტოვი — დაბა უდარნიში მდებარე მე-10 გამასწორებელი კოლონიის უფროსი;

  • მისი მოადგილეები;

  • გალინა მოქშანოვა — ამავე კოლონიის სამედიცინო ნაწილის ხელმძღვანელი.

მე-10 კოლონიაში ასობით უკრაინელი იმყოფებოდა. ყოფილი დაკავებულები ადასტურებენ სისტემატურ წამებას, შეურაცხყოფას, სიკვდილით დასჯის იმიტაციასა და სამედიცინო დახმარებაზე უარის თქმას.

"ევროკავშირი მკაცრად გმობს უკრაინელი სამხედრო ტყვეებისა და სამოქალაქო დაკავებულების წამებას, სასტიკ მოპყრობასა და მკვლელობას. უწყება მოუწოდებს დამოუკიდებელ დამკვირვებლებს, მათ შორის წითელი ჯვრის საერთაშორისო კომიტეტს, მიეცეთ შეუფერხებელი წვდომა ყველა დაკავებულთან და კიდევ ერთხელ უსვამს ხაზს საერთაშორისო ჰუმანიტარული სამართლის უხეშ დარღვევებზე პასუხისმგებლობის დაკისრების აუცილებლობას", — ნათქვამია განცხადებაში.