თბილისის საქალაქო სასამართლოში ე.წ საბოტაჟის საქმეზე პარტია ნეიტრალური საქართველოს წევრები — ნანა კაკაბაძე, ბიძინა გიორგობიანი, ვატო შაქარიშვილი, გელა ნიკოლაიშვილი და ლევან ნიკოლაიშვილი დაიკითხნენ.

პროკურატურამ სწორედ ნეიტრალური საქართველოს საჩივრის საფუძველზე დაიწყო ოპოზიცონერი პოლიტიკოსების წინააღმდეგ სამართლებრივი დავა.

პარტიის ერთ-ერთი ლიდერის, ვატო შაქარიშვილის განცხადებით, დაკითხვაზე პროკურატურას "ვრცელი მასალა" წარუდგინეს, რომელიც ოპოზიციური პარტიების "მოქმედების ჯაჭვს" ასახავს.

"მტკიცებულებებია მთელი მათი საქმიანობა 25 წლის განმავლობაში. ჩვენ გვაქვს წარდგენილი ძალიან ვრცელი მასალა, მათ მოქმედებათა ჯაჭვი, ყველა მათი მოქმედება იყო კოორდინირებული, იმართებოდა ერთი ცენტრიდან, იყო ერთი სცენარი, რომელშიც აგენტურული ქსელის ყველა რგოლს ჰქონდა თავისი დავალება.

აგენტურული ქსელი შედგება რამდენიმე ნაწილისგან: ეს იყო ეგრეთ წოდებული პოლიტიკური პარტიები, ეს იყო მედიები, ეს იყო NGO-ები, ეს იყო ეგრეთ წოდებული ცალკეული წარმომადგენლები სხვადასხვა სფეროების, რომელიც იყო კოორდინირებული, ორგანიზებული და დაფინანსებული ქვეყნის გარედან.

... არაერთი ქვეყნიდან, არაერთი ცენტრიდან [ხდებოდა მათი დაფინანსება]. სამართლებრივი მტკიცებულებების [მოპოვება] ჩვენი განცხადების საფუძველზე, ეს უკვე იყო პროკურატურის პრეროგატივა. ჩვენ არ გვაქვს შესაბამისი საგამოძიებო, ესე ვთქვათ, უფლებამოსილება. ჩვენ წარვადგინეთ ძალიან ვრცელი მასალა, რომელიც იყო აგებული მათივე საჯარო განცხადებებზე, მათივე ქმედებებზე, მათივე ქმედებებზე და იყო, მათ შორის, გაბმული ლოგიკური ჯაჭვი," — განაცხადა ვატო შაქარიშვილმა.

2025 წლის 8 ნოემბერს ცნობილი გახდა, რომ ე.წ საბოტაჟის საქმეზე ბრალი 8 ოპოზიციონერ პოლიტიკოსს აქვს წაყენებული — მიხეილ სააკაშვილს, გიორგი ვაშაძეს, ნიკა გვარამიას, ნიკანორ მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძეს და ბადრი ჯაფარიძეს.

ვის რა ბრალდება წარედგინა?

  • მიხეილ სააკაშვილი — საქართველოს სისხლის სამართლის კოდექსის 317-ე მუხლი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდების ფაქტზე;
  • ზურაბ გირჩი ჯაფარიძე და გიორგი ვაშაძე — საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლი, რაც საბოტაჟის და უცხო ქვეყნისათვის მტრულ საქმიანობაში დახმარებას გულისხმობს;
  • ელენე ხოშტარია — საქართველოს სისხლის სამართლის კოდექსის 318-ე მუხლის პირველი ნაწილი, 319-ე მუხლი და 321-ე პრიმა მუხლის პირველი ნაწილი, რაც საბოტაჟს, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარების ფაქტს გულისხმობს;
  • ნიკა გვარამია, ნიკანორ მელია, მამუკა ხაზარაძე და ბადრი ჯაფარიძე — საქართველოს სისხლის სამართლის კოდექსის 318-ე მუხლის პირველი ნაწილი, რაც სახელმწიფო საბოტაჟს გულისხმობს.

ე.წ საბოტაჟის საქმის დეტალები იხილეთ: