Netflix კლასიკურ სამაგიდო თამაშს, მონოპოლიას, რეალურ საკონკურსო სერიალად აქცევს.

შოუში 12 მონაწილე ერთმანეთს რეალური მასშტაბის მონოპოლიის ქალაქის მოედანზე დაუპირისპირდება. ისინი იყიდიან უძრავ ქონებას, დადებენ გარიგებებს და შეეცდებიან თავი აარიდონ პროექტიდან გამოთიშვას. შოუს მთავარი პრიზი $2 მილიონი იქნება.

კონკურსის განმავლობაში მოთამაშეები შეძლებენ ფულის გამომუშავებას, უძრავი ქონების შეძენასა და საკუთარი აქტივების გაზრდას. ისინი, ვინც გაკოტრდებიან, სათითაოდ დატოვებენ შოუს. გამარჯვებული და მთავარი პრიზის მფლობელი კი უკანასკნელი, გადარჩენილი მონაწილე გახდება.

ფოტო: Deadline

Netflix მსურველებს იწვევს, მონაწილეობა მიიღონ ონლაინ კასთინგში და შოუში მოსახვედრად განაცხადი შეავსონ.

სერიალი მონოპოლიის (Monopoly) პრემიერა 2027 წლის შემოდგომაზე იგეგმება. ეს არის Netflix-ის მორიგი პროექტი, რომელიც ხალხის საყვარელი თამაშებისა და ფილმების მიხედვით შეიქმნება. მანამდე კი, 23 სექტემბერს, სტრიმინგ პლატფორმამ როალდ დალის ნაწარმოებებით შთაგონებული საკონკურსო შოუს, ვონკას ოქროს ბილეთის (Wonka's The Golden Ticket) დებიუტი დააანონსა.

ფოტო: Netflix

მონოპოლიის სერიალზე იმუშავებს კომპანია Studio Lambert, რომელმაც შექმნა ისეთი ცნობილი პროექტები, როგორებიცაა Squid Game: The Challenge და The Circle.

ბოლო წლებში Netflix თამაშებზე დაფუძნებულ საკონკურსო ფორმატს სულ უფრო ხშირად მიმართავს.