აშშ-ის მეინის შტატში, საიმიგრაციო ოპერაციის დროს, საიმიგრაციო და საბაჟო კონტროლის სამსახურის (ICE) აგენტმა კოლუმბიის მოქალაქე სასიკვდილოდ დაჭრა. ერთი კვირის წინ კი უწყებამ ტეხასში, ავტომობილის გაჩერებისას, კიდევ ერთი მიგრანტის წინააღმდეგ გამოიყენა ლეტალური ძალა. ინფორმაციას BBC ავრცელებს.

ბოლო ინციდენტის შესახებ ICE-მა განაცხადა, რომ აგენტები ორშაბათს, ადგილობრივი დროით დაახლოებით 07:00 საათზე (11:00 GMT), ქალაქ ბიდეფორდში აკვირდებოდნენ კონკრეტულ მისამართს, სადაც იმყოფებოდა პირი, რომლის მიმართაც ქვეყნიდან გაძევების საბოლოო გადაწყვეტილება იყო გამოტანილი.

როდესაც ICE-ის თანამშრომლებმა აღნიშნული მისამართიდან მომავალი ავტომობილის გაჩერება სცადეს,

"მანქანამ შემთხვევის ადგილიდან გაქცევა დააპირა და საზოგადოებრივი უსაფრთხოების გამო, ოფიცერმა ცეცხლი გახსნა", — განაცხადა ICE-მა და დასძინა, რომ "ავტომობილის მძღოლს ტყვია მოხვდა".

მოგვიანებით ბიდეფორდში ათობით დემონსტრანტი შეიკრიბა.

მეინის მთავარმა პროკურორმა განაცხადა, რომ ინციდენტში ICE-ის გაძევების ოპერაციების დეპარტამენტის (ERO) ოფიცერი მონაწილეობდა, რომელიც გამოძიების დასრულებამდე შვებულებაშია გაშვებული.

პირველადი განცხადებები მიუთითებს, რომ "სუბიექტმა ავტომობილით ოფიცრის მიმართულებით გაქცევა სცადა და იგი სასიკვდილოდ იქნა დაჭრილი", — განაცხადა მეინის გენერალურმა პროკურორმა აარონ ფრეიმ, რომელიც დემოკრატიული პარტიის წარმომადგენელია.

განცხადებაში ასევე ნათქვამია, რომ დაღუპულის ვინაობა არ სახელდება იქამდე, სანამ მისი ოფიციალური იდენტიფიცირება არ მოხდება და ოჯახს არ ეცნობება.

კოლუმბიის საელჩომ დაადასტურა, რომ მოკლული პირი კოლუმბიის მოქალაქე იყო. საელჩომ აღნიშნა, რომ მათ DHS-სგან "მოითხოვეს ინფორმაცია და განმარტება ამ სამწუხარო სიკვდილის გარემოებებთან დაკავშირებით და გამოძიების მიმდინარეობას ყურადღებით მიადევნებენ თვალს".

"მეინის მიგრანტთა უფლებების კოალიციის" ინფორმაციით, მოკლული პირი 26 წლის კოლუმბიელი იყო, რომელსაც აშშ-ში მუშაობის უფლება ჰქონდა.

"ის ჩვენი საზოგადოების წევრი, მეზობელი და ადამიანი იყო, რომლის სიცოცხლეც ტრაგიკულად შეწყდა", — ნათქვამია ორგანიზაციის განცხადებაში, სადაც კაცის სახელი მითითებული არ არის.

სროლის შემდეგ ბიდეფორდში, პორტლენდიდან 30 კმ-ის დაშორებით, საპროტესტო აქციები დაიწყო.