დე-ფაქტო სამხრეთ ოსეთის პროკურატურა ასაჩივრებს სასამართლოს გადაწყვეტილებას, რომლის მიხედვითაც ახალგორელ აქტივისტს, თამარ მეარაყიშვილს ყველა ბრალდება მოეხსნა. ინფორმაციას ამის შესახებ თავად მეარაყიშვილი ავრცელებს.

აქტივისტი წერს, რომ პროცესი უზენაესი სასამართლოს კოლეგიაში დაახლოებით ერთ თვეში გაიმართება. მისი თქმით, ადვოკატთან შეთანხმების გასაფორმებლად თანხა სჭირდება. მეარაყიშვილი ანაგრიშის ნომერს აქვეყნებს და საზოგადოებას დახმარებას სთხოვს.

თამარ მეარაყიშვილის საქმე

თამარ მეარაყიშვილის მიმართ სამხრეთ ოსეთის დე ფაქტო რესპუბლიკის პროკურატურამ რიგით მეორე სისხლის სამართლის საქმე მარტში აღძრა. საქმე აღიძრა მუხლით, რომელიც ოფიციალური დოკუმენტების, ჯილდოების, ბეჭდის, შტამპის, ბლანკის გაყალბებას ითვალისწინებს. პროკურატურა მას დე-ფაქტო სამხრეთ ოსეთის მოქალაქის ყალბი პასპორტის დამზადებას ედავებოდა.

მეარაყიშვილი 2017 წლის 16 აგვისტოს დააკავეს დე ფაქტო სამხრეთ ოსეთის მმართველი პოლიტიკური პარტიის ედინაია ოსეტიას მიმართ ცილისწამების ბრალდებით. მას შემდეგ ოთხი სასამართლო პროცესი ჩატარდა ცხინვალში, ბრალდებულის სახლი არაერთგზის გაიჩხრიკა, არაერთი დაკითხვა ჩატარდა, თუმცა გამოძიებამ მაინც ვერ შეძლო საკმარისი მტკიცებულების მოპოვება იმის დასამტკიცებლად, რომ მეარაყიშვილი დამნაშავეა.

თამარს ყველანაირი დოკუმენტი ქონდა ჩამორთმეული და გადაადგილების უფლება შეზღუდული. მთელ დროს ის ახალგორში, საკუთარ სახლში ატარებდა და გარეთ გასვლას მხოლოდ სასამართლო პროცესზე ან დაკითხვაზე წასვლის შემთხვევაში ახერხებს, ისიც ადვოკატის თანხლებით.

2019 წლის 10 ივლისს დე-ფაქტო სასამართლომ მეარაყიშვილს ყველა ბრალდება მოუხსნა, მათ შორის გაუუქმდა გადაადგილების შეზღუდვაც.