ქართული ოცნების დეპუტატმა, მამუკა მდინარაძემ მოქმედი გენერალური პროკურორის, შალვა თადუმაძის დიპლომის ნამდვილობის დასადასტურებლად იუსტიციის უმაღლესი საბჭოს არამოსამართლე წევრის, ნაზი ჯანეზაშვილის დიპლომი წარადგინა. როგორც ცნობილია, თბილისის ჰუმანიტარულ ინსტიტუტს, სადაც შალვა თადუმაძე სწავლობდა სასამართლოს დადგენილებით სახელი 2003 წელს შეეცვალა და ნოდარ დუმბაძის სახელობის თბილისის უნივერსიტეტი გახდა. თუმცა თადუმაძის დიპლომში, რომელიც 5 წლით ადრე გაიცა, ეს სახელია მითითებული.

მდინარაძემ განაცხადა, რომ ჯანეზაშვილის დიპლომშიც ინსტიტუტის იგივე სახელი წერია, მიუხედავად იმისა, რომ საბჭოს წევრმა სასწავლებელი 2002 წელს დაამთავრა. მისი თქმით, ოპოზიციის არგუმენტი იმაზე, რომ თადუმაძის დიპლომი სახელწოდების გამო ნამდვილი არ არის გვერდზე უნდა გადაიდოს, რადგან ჯანეზაშვილის დიპლომის ნამდვილობაში პარლამენტში ეჭვი არავის შეუტანია. თუმცა, ამ დიპლომებს განასხვავებს ის ფაქტი, რომ თადუმაძესთან ჩარიცხვის თარიღად ის წელია მითითებული, როცა ინსტიტუტი გახსნილი არ იყო.

შალვა თადუმაძისა და ნაზი ჯანეზაშვილის დიპლომები

შალვა თადუმაძისა და ნაზი ჯანეზაშვილის დიპლომები

ფოტო: საერთაშორისო გამჭვირვალობა საქართველო / საქართველოს პარლამენტი

ჯანეზაშვილი ადასტურებს, რომ მის დიპლომში ეს სახელი წერია და აცხადებს, რომ დიპლომს აქვს ყველა ის რეკვიზიტი, რაც უნდა ქონდეს და მისი ნამდვილობა ეჭქვეშ არ დგება. მისი თქმით, სწავლისას სტუდენტები იმაზე არ ფიქრობენ, თუ რომელი აქტით მიენიჭა სასწავლებელს სახელი.

"შეიძლება სამეწარმეო რეესტრში ან სასამართლოს მიერ მოგვიანებით გატარდა და რაიმე შიდა აქტი იყო. კორუფცია, რომ იყო მაშინ განათლების სისტემაში აღიარებულია ეს ამბავი და მამა აბრამის ბატკნებივით ნუ ლაპარაკობენ.

სახელმწიფოს ლიცენზიებით არსებობდა ასეთი ინსტიტუტები და რისი შესაძლებლობაც ქონდა ჩემს ოჯახს, იქ ვსწავლობდი. თუმცა, ამაზე არ გავჩერებულვარ და რამდენიმე საერთაშორისო უნვიერსიტეტში ვისწავლე, რომელთა დიპლომების ნამდვილობა, ასევე, არ დამდგარა ეჭვქვეშ. მარტო ამით არ წარვმდგარვარ მე პარლამენტში", — განაცხადა მან On.ge-სთან საუბრისას.

ჯანეზაშვილი ხაზს უსვამს იმ ფაქტს, რომ თადუმაძის დიპლომის ნამდვილობა ეჭვქვეშ არამხოლოდ სახელმა, არამედ ჩარიცხვისა და ინსტიტუტის დაარსების თარიღების აცდენამაც გამოიწვია.

როგორც საერთაშორისო გამჭვირვალობა საქართველომ გაარკვია, თადუმაძის დიპლომის მიხედვით ის 1993 წელს ჩაირიცხა უნივერსიტეტში, რომელიც 1994 წელს დაარსდა. თადუმაძემ ეს ფაქტი ექსტერნად ჩაბარებით განმარტა.

მისი თქმით, მაშინ აუცილებელი მოთხოვნა იყო, დიპლომში სწავლის ხანგრძლივობა მიეთითებინათ. ვინაიდან მან 1994 წელს ჩააბარა და 5-წლიანი კურსი ექსტერნად 1998 წელს დაასრულა, დიპლომის გამცემმა 5-წლიანი პროგრამის ჩასათვლელად თარიღი გადაწია და 1993 წელი ჩაუწერა.

გაიგეთ მეტი: