"ინგლისური ტექსტი წაკითხული გაქვთ თქვენი დიპლომის? 20 სიტყვაში 10 შეცდომაა", — ასე მიმართა ევროპული საქართველოს დეპუტატმა, გიგა ბოკერიამ უზენაესის მოსამართლეობის კანდიდატს, შალვა თადუმაძეს, რომელიც ამავე დროს გენერალური პროკურორია.

შალვა თადუმაძემ პარლამენტში მოსმენაზე საკუთარი დიპლომის გარშემო არსებულ კითხვებს უპასუხა. მისი თქმით, ინსტიტუტში ჩაბარებასა და ინსტიტუტის დაარსებას შორის აცდენა უკავშირდება იმას, რომ მან სასწავლებელი ექსტერნად დაასრულა.

გიგა ბოკერია კი ამბობს, რომ თადუმაძის ინსტიტუტი დიპლომებს აყალბებდა:

"რას ერჩოდით თქვენს თავს. თქვენ როგორც აღწერეთ ეს უნივერსიტეტი, იყო უნივერსიტეტი, რომელმაც გააყალბა გრაფა იმიტომ, რომ ხუთწლიანი მოთხოვნა დაეკმაყოფილებინა".

შალვა თადუმაძის დიპლომთან დაკავშირებით კითხვები არსებობს. ამ საკითხზე საუბრობენ როგორც არასამთავრობო ორგანიზაციები და სახალხო დამცველი, ისე ოპოზიცია და ხელისუფლება. ამ საკითხზე მას კითხვა დღევანდელ კომიტეტის სხდომაზეც დაუსვეს. დოკუმენტების მიხედვით, თადუმაძემ 1993 წელს ჩააბარა იმ უნივერსიტეტში, რომელიც 1994 წელს დაარსდა.

შალვა თადუმაძე ამბობს, რომ მან ინსტიტუტში 16 წლის ასაკში 1994 წელს ჩააბარა, იმავე წელს, რა წელსაც დაარსდა სასწავლებელი. მისივე მტკიცებით, 1998 წელს მან ხუთწლიანი სასწავლო კურსი ექსტერნად დაასრულა. თადუმაძის განმარტებით, დიპლომში ჩაიწერა ინსტიტუტის დასრულების თარიღი და სასწავლო კურსის ხუთწლიანი ხანგრძლივობა, რამაც ორაზროვნება გამოიწვია.