მთავარი არხის ინფორმაციით, შინაგან საქმეთა სამინისტროში სამცხე–ჯავახეთის პოლიციის დეპარტამენტის ყოფილი უფროსი თეიმურაზ კალანდაძე დააბრუნეს. ის გენერალური ინსპექციის ერთ-ერთი სამმართველოს უფროსის პოსტს დაიკავებს. კალანდაძე 2018 წელს სამინისტროდან მაშინდელმა მინისტრმა გიორგი გახარიამ გაათავისუფლა.ვახტანგ გომელაურის თქმით კი, კალანდაძე მუშაობდა უწყებაში და სახლში არავის გაუშვია.

"სამმართველოს უფროსები და მოადგილეები ჩემს დონეზე არ გადის, თავად წყვეტენ დეპარტამენტების ხელმძღვანელები", — განაცხადა გომელაურმა.

შინაგან საქმეთა სამინისტროში On.ge-ს უთხრეს, რომ მინისტრის კომენტარს დავეყრდნოთ და დამატებითი ინფორმაციის მისაღებად განცხადება დავწეროთ.

თეიმურაზ კალანდაძის გათავისუფლების მიზეზი თბილისში, საკუთარ სახლში კრიმინალური ავტორიტეტის, ალექსანდრე კობალაძის ვაჟის კობა კობალაძის ცემის საქმეს უკავშირდება. კობალაძე ამბობდა, რომ მას მამის ადგილსამყოფელის დადგენის მიზნით დაესხნენ თავს.

მაშინ შინაგან საქმეთა მინისტრმა, გიორგი გახარიამ თქვა, რომ კობალაძეების საცხოვრებელ ბინაში გლდანი-ნაძალადევის განყოფილების პოლიციის თანამშრომლები, უბნის ორი ინსპექტორ-გამომძიებელი იყო მისული. ამიტომ სამსახურიდან ორივე მათგანი გათავისუფლდა. ამასთან, სამსახურიდან გათავისუფლდნენ პოლიციელების უშუალო ხელმძღვანელი და ქალაქ თბილისის პოლიციის დეპარტამენტის გლდანი-ნაძალადევის სამმართველოს უფროსი თეიმურაზ კალანდაძე. პოლიციელთა მხრიდან შესაძლო დანაშაულის ჩადენის ფაქტს თბილისის პროკურატურა იძიებს.

თეიმურაზ კალანდაძე სამცხე–ჯავახეთის პოლიციის დეპარტამენტის უფროსად, ვიდრე მას გლდანი ნაძალადევის სამმართველოში გადაიყვანდნენ, ოთხი წლის განმავლობაში 2017 წლის 2 აგვისტომდე მუშაობდა. ამ პერიოდში მას არა ერთი ხმაურიანი საქმე უკავშირდებოდა.

სამხრეთის კარიბჭის ცნობით, ბრალდებული გიორგი კაპანაძე აცხადებდა, რომ იგი თეიმურაზ კალანდაძემ ჯერ წიხლებით, შემდეგ კი სნოს ბოთლით სცემა. სამცხე–ჯავახეთის საოლქო პროკურატურამ პოლიციელის მხრიდან უფლებამოსილების გადამეტების შესაძლო ფაქტზე გამოძიება დაიწყო, თუმცა დანაშაულის ნიშნების არარსებობის გამო შეწყვიტა.

სამცხე–ჯავახეთის სამმართველოში კალანდაძის ხელმძღვანელობის პერიოდში, პოლიციელების მხრიდან არაადამიანურ მოპყრობაზე საუბრობდა ბრალდებული სერგეი ბაბოიანიც: "ჯერ მცემეს, მერე მუხლებზე და ხელებზე დამაყენეს, მატარეს და მაყეფეს", — ყვებოდა ის.

კალანდაძეს ცემასა და გაუპატიურების მუქარაში ადანაშაულებდა, ასევე, ერთ–ერთი ბრალდებულის და ახალქალაქიდან. იგი ამბობდა, რომ "სამხარეოს უფროსმა წიხლები ურტყა ტანსაცმელი შემოაგლიჯა და გაუპატიურებით დაემუქრა".

სამცხე–ჯავახეთში სამხარეო სამმართველოში გადმოყვანამდე თეიმურაზ კალანდაძე თბილისში, გლდანი ნაძალადევის პოლიციაში გამომძიებლად მუშაობდა. აქ მას შსს გენერალურმა ინსპექციამ უღირსი საქციელისთვის სასტიკი საყვედური გამოუცხადა. ამჯერად საქმე პატიმრის მეუღლესთან სასიყვარულო ურთიერთობას ეხებოდა.