შინაგან საქმეთა სამინისტროს ცნობით, ოჯახში ძალადობის და ოჯახური დანაშაულის ნიშნით ჩადენილი მუქარის ბრალდებით ერთი პირი დააკავეს.

უწყებაში აცხადებენ, რომ ვაკე-საბურთალოს სამმართველოში შევიდა შეტყობინება, რომ თბილისში, მოქალაქეს სახლში ჩაკეტილი ჰყავდა ცოლი და ორი მცირეწლოვანი შვილი, რომლებზეც ფსიქოლოგიურად ძალადობდა და სიცოცხლის მოსპობით ემუქრებოდა.

შსს-ს განცხადებით, პოლიციის არაერთი მოწოდების მიუხედავად, მოქალაქე არ გამოდიოდა კავშირზე და კარს არ აღებდა. საბოლოოდ პოლიციამ ბინაში სპეცტექნიკის გამოყენებით შეაღწია და ბრალდებული დააკავა. დაკავებულის ოჯახს საფრთხე აღარ ემუქრება.

გამოძიება ოჯახში ძალადობის და ოჯახური დანაშაულის ნიშნით ჩადენილი მუქარის ფაქტებზე, საქართველოს სისხლის სამართლის კოდექსის 126¹ და 11¹, 151-ე მუხლებით მიმდინარეობს.