საფრანგეთის პრეზიდენტის ადმინისტრაცია 10 ევროპული სახელმწიფოს ერთობლივ დეკლარაციას ავრცელებს, რომელიც "ინტეგრირებული ანტიბალისტიკური კოალიციის" შექმნას ეხება. დოკუმენტის თანახმად, ახალი გაერთიანება სრულად თავდაცვითი ხასიათისაა და მიზნად ისახავს ევროპის კონტინენტის უსაფრთხოების განმტკიცებას ბალისტიკური რაკეტების მხრიდან მომავალი საფრთხეების ფონზე.

კოალიციის დამფუძნებელი წევრები არიან დანია, საფრანგეთი, გერმანია, იტალია, ნიდერლანდები, ნორვეგია, ესპანეთი, შვედეთი, გაერთიანებული სამეფო და უკრაინა. პარტნიორები გეგმავენ, საკუთარი სამრეწველო, სამეცნიერო და ოპერატიული რესურსების გაერთიანებით, შექმნან საერთო რაკეტსაწინააღმდეგო არქიტექტურა, რომელიც შეავსებს ევროპაში უკვე არსებულ თავდაცვის სისტემებს. დოკუმენტში განსაკუთრებული ყურადღება ეთმობა უკრაინის უნიკალურ გამოცდილებას, რომელიც მან რუსეთის აგრესიის წინააღმდეგ თავდაცვის პროცესში დააგროვა. კოალიციის ფარგლებში შემუშავდება საერთო ოპერატიული სტანდარტები, ერთობლივი სამუშაო ჯგუფები და განვითარების საგზაო რუკა, რაც სამომავლოდ კოალიციას ახალი წევრი ქვეყნების მიღების შესაძლებლობასაც მისცემს.

"ჩვენ, დანიის, საფრანგეთის, გერმანიის, იტალიის, ნიდერლანდების, ნორვეგიის, ესპანეთის, შვედეთის, უკრაინისა და გაერთიანებული სამეფოს ლიდერები, ვაცნობიერებთ რა ბალისტიკური რაკეტების მხრიდან მზარდ საფრთხესა და თავდაცვის შესაძლებლობების მზარდ მნიშვნელობას ევროპის კონტინენტის უსაფრთხოებისთვის, დღეს ვაცხადებთ წმინდად თავდაცვითი ხასიათის ანტიბალისტიკური კოალიციის შექმნის ინიცირებას. ჩვენ გამოვხატავთ მხარდაჭერას მისი ფლაგმანი პროექტის მიმართ, რათა სწრაფი ტემპით ვიმუშაოთ ანტიბალისტიკური შესაძლებლობების განსავითარებლად.

ჩვენ გვჯერა, რომ ევროპის დაცვა მოითხოვს ინტეგრირებული რაკეტსაწინააღმდეგო თავდაცვის არქიტექტურის გლობალურ გადაწყვეტას მომავალი სარაკეტო საფრთხეების შესაკავებლად და მოსაგერიებლად, რომელიც შემუშავებული იქნება კოლექტიური ძალისხმევით, ტექნოლოგიური ღიაობითა და სანდო ინდუსტრიული თანამშრომლობით. იგი შეავსებს არსებულ ანტიბალისტიკურ თავდაცვის სისტემებს, მათ შორის სუვერენულ ევროპულ გადაწყვეტილებებს, რომლებიც მონაწილე ქვეყნებმა უკვე შეიძინეს ან მომავალში შეიძენენ. ჩვენი თავდაცვითი ინდუსტრიული ბაზის, კვლევებისა და ოპერატიული გამოცდილების გაერთიანებით, ჩვენ მიზნად ისახავთ ევროპისთვის საერთო ანტიბალისტიკური შესაძლებლობების შექმნას და მასში წვლილის შემტანი შესაბამისი საქმიანობების მხარდაჭერას. ამას ვაკეთებთ არა რომელიმე ხალხის წინააღმდეგ, არამედ საკუთარი ხალხის დასაცავად.

ჩვენ ვაღიარებთ უკრაინის უნიკალურ გამოცდილებას, რომელიც მან რუსეთის აგრესიული ომისგან თავდაცვისას შეიძინა.

ამ დეკლარაციით, ჩვენ მიზნად ისახავთ საერთო ოპერატიული მოთხოვნების, ერთობლივი ტექნიკური სამუშაო ჯგუფების, მართვის მკაფიო მექანიზმებისა და კოალიციის პირველი ოპერატიული შესაძლებლობებისკენ მიმავალი საგზაო რუკის შემუშავებას — ჩვენი შესაბამისი კონსტიტუციური წესრიგისა და საერთაშორისო ვალდებულებების შესაბამისად.

ჩვენ შევეცდებით მხარი დავუჭიროთ ერთობლივ კვლევით და განვითარების ღონისძიებებს ფლაგმანი პროექტის ფარგლებში, მათ შორის დაფინანსების შესაბამისი შესაძლებლობების მოძიების გზით, და ხელი შევუწყოთ მონაცემებისა და ინფორმაციის გაფართოებულ გაცვლას.

კოალიციის დამფუძნებელი წევრები არიან დანია, საფრანგეთი, გერმანია, იტალია, ნიდერლანდები, ნორვეგია, ესპანეთი, შვედეთი, უკრაინა და გაერთიანებული სამეფო.

კოალიცია ღია რჩება სხვა სახელმწიფოებისთვის, რომლებიც იზიარებენ მის პრინციპებსა და მიზნებს", — აღნიშნულია პრეზიდენტის ადმინისტრაციის მიერ გამოქვეყნებულ ტექსტში.