თიბისის ელექტრონული კომერციის ახალი პლატფორმა, Vendoo.ge უკვე ამოქმედდა. მომხმარებელს შესაძლებლობა აქვს, მისთვის სასურველი პროდუქცია სახლიდან გაუსვლელად, სწრაფად და მარტივად შეიძინოს.

საწყის ეტაპზე ვენდუზე 3 კატეგორიის, ჯამში 5000-ზე მეტი პროდუქტია განთავსებული, რომელთაც ყოველდღიურად 200-ზე მეტი დასახელების ახალი ნივთი ემატება. უახლოეს მომავალში ვებგვერდს ახალი კატეგორიის პროდუქცია დაემატება, მათ შორის - ეზოს და სახლის ინვენტარის მიმართულებით.

"დღეს იხსნება ელექტრონული კომერციის საიტი Vendoo, რომელიც ძალიან მნიშვნელოვანია არამარტო თიბისისთვის, არამედ საქართველოს რეალობისთვის, რადგან ის მოემსახურება მცირე და საშუალო ბიზნესის წარმომადგენლებს. ერთი მხრივ, მათ მისცემს საშუალებას მოახდინონ თავიანთი პროდუქტის რეალიზება სივრცეში და მეორე მხრივ, მომხმარებლებს ექნებათ საშუალება სახლიდან გაუსვლელად შეიძინონ სასურველი პროდუქცია", - აღნიშნა თიბისის გენერალურმა დირექტორმა ვახტანგ ბუცხრიკიძემ.

Vendoo გამოირჩევა კომფორტული და მარტივი ვებგვერდით, სწრაფი მიტანის სერვისით მთელი საქართველოს მასშტაბით, ასევე ნივთის დაბრუნების განსაკუთრებული პირობებით.სასურველი პროდუქციის შეძენა ნებისმიერ დროს, 24/7-ზეა შესაძლებელი, კვალიფიციური კონსულტანტები კი მომხმარებელს სრულფასოვან სატელეფონო და ონლაინ მომსახურებასგაუწევენ.

Vendoo.ge გაყიდვების გამარტივებული პლატფორმაა ბიზნესების წარმომადგენლებისთვისაც. პლატფორმა მათ გამართული სასაწყობე სისტემით, ონლაინ მარკეტინგული მომსახურებითა და სწრაფი მიწოდების სერვისით უზრუნველყოფს. აღნიშნული მომსახურება პარტნიორ კომპანიებს შესაძლებლობას მისცემს, საკუთარი პროდუქცია მთელი საქართველოს მასშტაბით გაყიდონ და გააფართოვონ ბიზნესი.

"ჩვენ შევთავაზებთ მომხმარებლებს ძალიან ბევრ სიახლესა და სიურპრიზს სხვადასხვა შეთავაზებების სახით. ჩვენთვის ძალიან მნიშვნელოვანია, რომ ვინც 1 ივნისამდე გაივლის რეგისტრაციას და შეიძენს რაიმე პროდუქტს, მთელი ზაფხულის განმავლობაში განსაკუთრებული პირობებით ისარგებლებს. ყველას მოვუწოდებთ, რომ გატესტონ საიტი და აზრები გაგვიზიარონ, რადგან ჩვენ მზად ვართ მივიღოთ რჩევები და გამოვასწოროთ შეცდომები", - თქვა ლაშა მაჭავარიანმა, Vendoo-ს გენერალურმა დირექტორმა.

ვენდუ მუდმივი გაუმჯობესებისა და დახვეწის პროცესშია. შესაბამისად, ვებგვერდს ყოველდღიურად ემატება ახალი პროდუქტები, სერვისები და ფუნქციები.

მომხმარებლებს, რომლებიც ვენდუზე 1 ივნისამდე დარეგისტრირდებიან, მთელი ზაფხულის განმავლობაში განსაკუთრებული სიურპრიზები ელით.