პროსტიტუციის ხელშეწყობისა და ამავე მიზნით ფართის გადაცემის მუხლებით დაკავებულმა სასტუმრო "მამიდას" მფლობელმა, როენა ხუცურაულმა საპატიმრო 30 ათას ლარიანი გირაოს გადახდის შემდეგ დატოვა. ამის შესახებ ინფორმაცია On.ge-ს სპეციალურ პენიტენციურ სამსახურში დაუდასტურეს.

სასტუმრო მამიდას მფლობელს, როენა ხუცურაულს თბილისის საქალაქო სასამართლოში აღკვეთი ღონისძიების სახით 30 ათასი ლარის გადახდა შეუფარდეს. მას თანხის გადასახდელად 20-დღიანი ვადა ჰქონდა.

დაკავების შემდეგ როენა ხუცურაულის ადვოკატი აცხადებდა, რომ ბრალდებული ბრალს არ აღიარებდა. სასამართლო პროცესის მსვლელობისას, როენა ხუცურაულმა თქვა, რომ სასტუმროს შენობა გაქირავებული ჰქონდა და იგი იქ კათარზისის გაკეთებას გეგმავდა. პროცესის დროს ტექნიკური შესვენება გამოცხადდა, სხდომის განახლებისას კი როენა ხუცურაულმა პოზიცია შეცვალა და ბრალი აღიარა. ამის შემდეგ ბრალდების მხარე დათანხმდა გირაოს შეფარდებაზე და ამის მიზეზად აღნიშნა ის, რომ 'ბრალდებულმა დანაშაული მოინანია".

როენა ხუცურაული საკუთარ სახლშივე 8 მაისს დააკავეს. საქმეზე გამოძიება სისხლის სამართლის კოდექსის 254-ე მუხლის პირველი ნაწილით, ასევე, ამავე მუხლის მესამე ნაწილის "ა" და "გ" ქვეპუნქტებით მიმდინარეობს, რაც პროსტიტუციის ხელშეწყობის და წინასწარი შეთანხმებით ჯგუფის მიერ სასტუმროს ნომრების პროსტიტუციისთვის გადაცემას გულისხმობს. ამ მუხლით გათვალისწინებულია პატიმრობა ორიდან ექვს წლამდე.