საქართველოს შინაგან საქმეთა მინისტრი გიორგი გახარია აცხადებს, რომ ფარული ჩანაწერების საქმეზე ყურება, შენახვა, გავრცელება და "კიდევ ბევრი რაღაც" ერთი რიგის დანაშაულია.

ამ განცხადებით შს მინისტრმა უპასუხა ქართული ოცნების დეპუტატის, ნინო წილოსანის კითხვას, ხომ არ დაიჭირეს ის ადამიანებიც, რომლებმაც ფარული ცხოვრების კადრებს "შემთხვევით უყურეს".

"თქვენ ბრძანეთ, რომ შემთხვევით ვინც უყურა ისინი ხომ არ გყავთ დაკავებულიო, თითქოს უყურება შემთხვევითი საქციელი იყოს. ყურება ეს არის ქმედება, ყურება, შენახვა გავრცელება და კიდევ ბევრი რაღაც არის ერთი ზომის და რიგის დანაშაული. როგორც კი ჩვენ ამას განვასხვავებთ, ამ საქმეში ვერანაირ პროგრესს ვერ მივაღწევთ", — განაცხადა გიორგი გახარიამ.

პოლიტიკოსის პირადი ცხოვრების კადრები სოციალურ ქსელებში არაერთხელ გავრცელდა, მათ შორის, 28 და 31 იანვარს. პირველ იანვარს შინაგან საქმეთა სამინისტრომ აღნიშნული ვიდეოს ნახვის, მესენჯერში გაგაზავნისა და სხვა ფორმით გავრცელების ბრალდებით 16 ადამიანი დააკავა.

დაკავებულთაგან ერთ-ერთმა საკონსტიტუციო სასამართლოში სარჩელი შეიტანა და იმ მუხლის გაუქმებას ითხოვს, რომლითაც მას პატიმრობა ემუქრება. ერთი დაკავებული კი აცხადებს, რომ მას ვიდეო არ უნახავს და მესენჯერში დარჩენილი ლინკის გამო პატიმრობა უსამართლოდ ემუქრება.

იმავე პოლიტიკოსის კადრები კიდევ ერთხელ, 26 მარტს გავრცელდა. მაშინ პოლიტიკოსმა განაცხადა, რომ ვიდეოს შესახებ უწყება ინფორმირებული არ იყო და მათ თავად აცნობა. მეორე დღეს, 27 მარტს შსს-მ ვიდეოს Youtube-ზე ატვირთვის ბრალდებით ერთი პირი დააკავა.

გამოძიების ფარგლებში სულ 20 პირია დაკავებული. მათგან რამდენიმეს საქალაქო სასამართლომ აღკვეთის ღონისძიების სახით 5 000-ლარიანი გირაო შეუფარდა.