საქართველოს საგარეო საქმეთა მინისტრის, დავით ზალკალიანის განცხადებით, ევროკომისიის წარმომადგენლებთან შეხვედრისას ყველა იმ გეგმაზე ისაუბრეს, რომელიც სავიზო ლიბერალიზაციის არასწორად გამოყენების ფაქტებს შეამცირებს.

ზალკალიანის თქმით, "საქართველო მყისიერად რეაგირებს ჩვენი პარტნიორების ნებისმიერ წუხილზე, რომელიც არის დაკავშირებული ევროკავშირის ქვეყნებში საქართველოს მოქალაქეების მხრიდან თავშესაფრის მაძიებელთა ზრდაზე".

"მოგეხსენებათ, ამ მხრივ, მოვიდა ევროკავშირის სხვადასხვა წევრი ქვეყნებიდან შეტყობინება. აქედან გამომდინარე, ერთობლივ, მიზანმიმართულ ქმედებას ველოდებით, იმისთვის, რომ მოხდეს შემდგომი პრევენცია, უაღრესად დიდი მნიშვნელობა ენიჭება. ამიტომ დღევანდელ შეხვედრაზე ვისაუბრეთ ყველა იმ კონკრეტულ გეგმაზე, რომელიც მინიმუმამდე დაიყვანს და შეამცირებს მოქალაქეების მხრიდან სავიზო ლიბერალიზაციის არასწორად გამოყენების ფაქტებს", — განაცხადა დავით ზალკალიანმა.

ვიზალიბერალიზაციასთან დაკავშირებულ პრობლემებზე იუსტიციის მინისტრმა თეა წულუკიანმაც ისაუბრა. მან თქვა, რომ უვიზო რეჟიმის შენარჩუნებას ბოლო დროს განსაკუთრებული სიძნელეები შეექმნა.