ქართული ოცნების ყოფილი წევრი, ეკა ბესელია უზენაეს სასამართლოში მოსამართლეების არჩევის წესთან დაკავშირებით ვენეციის კომისიას ეხმაურება. მისი თქმით, კომისიის რეკომენდაცია, რომ უზენაესში ყველა მოსამართლე ამ მოწვევის პარლამენტმა არ უნდა აირჩიოს, პირდაპირი კრიტიკაა.

"როდესაც ვენეციის კომისია გეუბნება, რომ ისეთი დაბალი ნდობა აქვს საზოგადოების მხრიდან იუსტიციის საბჭოს, რომ ამ პარლამენტმა არ მიიღოს გადაწყვეტილება და ყველა მოსამართლე არ აირჩიოს და ახალმა პარლამენტმა აიღოს ეს მანდატი, ეს ნიშნავს არა მხოლოდ იმას, რომ იუსტიციის საბჭოს არა აქვს ნდობა, ამ პარლამენტსაც არ აქვს ნდობა იმიტომ, რომ პარლამენტი ირჩევს საბოლოოდ", — განუცხადა ბესელიამ ჟურნალისტებს.

ვენეციის კომისია იუსტიციის უმაღლესი საბჭოს ხელისუფლებას მიმართავს რეკომენდაციით, რომ უზენაესი სასამართლო სრულად არ დააკომპლექტოს. დასკვნაში ნათქვამია, რომ ქართული ოცნების ხელისუფლებამ იმ ოდენობის მოსამართლეები უნდა გაამწესოს, რამდენიც საჭიროა სასამართლოს გამართული მუშაობისთვის.

"ის თუ რამდენი მოსამართლეა საჭირო უზენაეს სასამართლოში პრობლემების აღმოსაფხვრელად, შესაძლოა, უზენაეს სასამართლოსთან კონსულტაციის შემდეგ დადგინდეს. ვენეციის კომისიის რეკომენდაციით, დასანიშნი მოსამართლეების ნახევარი უნდა გამწესდეს თანამდებობებზე 2020 წლის საპარლამენტო არჩევნების შედეგად მოსული ხელისუფლების პირობებში. ამგვარი მიდგომა უზრუნველყოფს იმას, რომ შენარჩუნდეს საზოგადოების ნდობა სასამართლო სისტემის მიმართ გრძელვადიან პერსპექტივაში", — ნათქვამია ვენეციის კომისიის დასკვნაში.

ამავე თემაზე: