იუსტიციის უმაღლესი საბჭოს ხელისუფლებას მიმართავს რეკომენდაციით, რომ უზენაესი სასამართლო სრულად არ დააკომპლექტოს. დასკვნაში ნათქვამია, რომ ქართული ოცნების ხელისუფლებამ იმ ოდენობის მოსამართლეები უნდა გაამწესოს, რამდენიც საჭიროა სასამართლოს გამართული მუშაობისთვის.

"ის თუ რამდენი მოსამართლეა საჭირო უზენაეს სასამართლოში პრობლემების აღმოსაფხვრლეად, შესაძლოა, უზენაეს სასამართლოსთან კონსულტაციის შემდეგ დადგინდეს. ვენეციის კომისიის რეკომენდაციით, დასანიშნი მოსამართლეების ნახევარი უნდა გამწესდეს თანამდებობეზე 2020 წლის საპარლამენტო არჩევნების შედეგად მოსული ხელისუფლების პირობებში. ამგვარი მიდგომა უზრუნველყოფს იმას, რომ შენარჩუნდეს საზოგადოების ნდობა სასამართლო სისტემის მიმართ გრძელვადიან პერსპექტივაში", — ნათქვამია ვენეციის კომისიის დასკვნაში.

საქართველოს პარლამენტის თავმჯდომარე, ირაკლი კობახიძე გამოეხმაურა ვენეციის კომისიის დასკვნაში ამ ჩანაწერს და განაცხადა, რომ ეს პოლიტიკური რეკომენდაციაა.

"რაც შეეხება მითითებას იმაზე, რომ არა ამ მოწვევამ ანდა სხვა მოწვევამ უნდა მიიღოს გადაწყვეტილება ამასთან დაკავშირებით, ეს არის უკვე პოლიტიკური რეკომენდაცია და ეს არის გაცდენილი სამართლებრივ ჩარჩოებს. ასეთი საკითხი, რა თქმა უნდა, ვერ იქნება ასახული ორგანულ კანონში. ორგანულ კანონში წერია ზუსტად ის, რაც წერია კონსტიტუციაში", — განაცხადა ირაკლი კობახიძემ.

ვენეციის კომისიის რეკომენდაციები უზენაესი მოსამართლეთა დანიშვნის წესებთან დაკავშირებით უკვე ცნობილია. რეკომენდაციები 14-გვერდიანია და 68 პუნქტს მოიცავს.

გაიგე მეტი: რა წერია ვენეციის კომისიის დასკვნაში უზენაესის მოსამართლეების დანიშვნაზე — რეკომენდაციები