პოეტი ზვიად რატიანი აცხადებს, რომ შინაგან საქმეთა მინისტრი გიორგი გახარია შეხვედრის სანაცვლოდ რამდენიმე პოლიციელის დასჯას ჰპირდებოდა. ამის შესახებ ზვიად რატიანმა On.ge-ს განუცხადა.

ის გამოეხმაურა გახარიას განცხადებასაც, რომლის მიხედვითაც მინისტრი რატიანის საქმეზე არაფერს ნანობს. პოეტის თქმით, "ეს რეინკარნირებული ჩეკისტი მხოლოდ სასაცილო იქნებოდა, ამხელა ძალაუფლებას რომ არ ფლობდეს და ასეთი საშიში არ იყოს ქვეყნისთვის".

"ის მთხოვდა შეხვედრას, რათა კამერების წინ ეკეკლუცა, და ამ შეხვედრის სანაცვლოდ მპირდებოდა რამდენიმე პოლიციელის დასჯას (რაოდენობაზე შევთანხმდებითო). მე მივუთითე იქ, სადაც მისი და მისნაირების ადგილია. რა მნიშვნელობა აქვს ჩემთვის, პოლიციაში რამდენიმე მოძალადით მეტი იქნება თუ ნაკლები, როცა მინისტრი თვითონ არის კრიმინალი", — განუცხადა On.ge-ს რატიანმა.

მისი თქმით, საქმეზე დავას სტრანსბურგში გააგრძელებს თავის იურისტებთან ერთად. ზვიდ რატიანის თქმით, პოლიციელები იდენტურ ჩვენებებს იძლევიან და ამტკიცებენ, რომ მან დაზიანება თავად მიიყენა.

"რაც შეეხება გინებას და კადრებს. მტერსაც არ ვუსურვებ, გადაიტანოს ის, რაც მე გადავიტანე, თორემ ვინ როგორ მოიქცევა და ვის რა სიტყვები ამოასხამს, არავინ იცის. აი ასეთი მართლმსაჯულებაა, ასეთი ქვეყანა, და ჩვენი დიდი სირცხვილია, ამ ყველაფერს რომ ვითმენთ და ვეგუებით. პირველ რიგში — ჩემი, რადგან ამდენი რამე ვიცი და მაინც ვპასიურობ" — ამბობს რატიანი.

"არცერთი წუთით იმაზე რაც მოხდა მაშინ არ ვნანობ. იმიტომ, რომ ჩვენ მოქალაქეები ვართ და ჩვენი პასუხისმგებლობა გვაკისრია ყველგან, ნასვამები ვართ, ქუჩაში ვართ თუ სადა ვართ და რას ვამბობთ იმაზეც", — ასე შეაფასა გიორგი გახარიამ TV პირველის ეთერში მწერალ ზვიად რატიანის საქმე. მისი თქმით, პოლიციელს აქვს ლეგიტიმური უფლება ძალა გამოიყენოს. მინისტრის თქმით, ცუდია თუ რატიანს ქვეყნის დატოვება მოუწია, მაგრამ მან დანაშაული ჩაიდინა, რაც სასამართლომაც დაადგინა.

ზვიად რატიანის საქმე

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ, სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 2017 წლის 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

საზოგადოებრივმა მაუწყებლის თვთრეგულირების მექანიზმის სააპელაციო საბჭომ პირველ მარტს რატიანის ვიდეოს მათ ეთერში გავრცელების საკითხი განიხილა და პერსონალური მონაცემების დარღვევა ვერ დაინახა.

2018 წლის 2 მარტს პერსონალურ მონაცემთა დაცვის ინსპექტორმა პოეტ ზვიად რატიანის ვიდეოს გასაჯაროების გამო შინაგან საქმეთა სამინისტრო სამართალდამრღვევად სცნო და 2 000 ლარით დააჯარიმა.

რატიანმა ინციდენტის შემდეგ ქვეყანა დატოვა. რატიანმა შინაგან საქმეთა სამინისტროს მხრიდან მორალური ზიანის ანაზღაურების მოთხოვნით სასამართლოს მიმართა.