პოეტი ზვიად რატიანი მორალური ზიანის ანაზღაურებისთვის სასამართლოს მიმართავს. როგორც ადამიანის უფლებების სწავლებისა და მონიტორინგის ცენტრის წარმომადგენელი, სოფო ვერძეული ამბობს, მოპასუხე მხარე არა რიგითი პოლიციელები, არამედ შინაგან საქმეთა სამინისტრო იქნება.

"ჩვენ ვიწყებთ ახალ სამართლებრივ პროცედურას, რომლის ფარგლებშიც მივმართავთ სასამართლოს და მოვითხოვთ იმ მორალური ზიანის ანაზღაურებას, რომელიც ზვიად რატიანს მიადგა უკანონოდ, მისი პერსონალური მონაცემების მოპოვების და შემდგომ ამ მონაცემების საჯაროდ გავრცელების საფუძველზე", - განაცხადა ვერძეულმა პრესკონფერენციაზე.

მისივე თქმით, ვიდეოჩანაწერის გავრცელებამ ზვიად რატიანისთვის "მძიმე ფონი შექმნა".

"მათ შორის, უსაფრთხოების განცდის სრულად მოშლა, თუ სხვა ტიპის სოციალური ბარიერები, რომელიც შეუქმნა ამ საქმემ და, რა თქმა უნდა, ამ საქმის არაეფექტიანმა გამოძიებამ", - თქვა ვერძეულმა.

2 მარტს პერსონალურ მონაცემთა დაცვის ინსპექტორმა პოეტ ზვიად რატიანის ვიდეოს გასაჯაროების გამო შინაგან საქმეთა სამინისტრო სამართალდამრღვევად სცნო და 2 000 ლარით დააჯარიმა.

ზვიად რატიანის საქმე

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეო კადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

ჟურნალისტური ეთიკის ქარტიის საბჭოს გადაწყვეტილებით, ვიდეოს გამოქვეყნებით, საზოგადოებრივი მაუწყებლის ახალი და მიმდინარე ბლოკის დირექტორმა გიორგი გვიმრაძემ და ვებსაიტის რედაქტორმა ირინა დეკანოიძემ ქარტიის პირველი და მეათე პრინციპები დაარღვიეს.

საზოგადოებრივმა მაუწყებლის თვთრეგულირების მექანიზმის სააპელაციო საბჭომ პირველ მარტს რატიანის ვიდეოს მათ ეთერში გავრცელების საკითხი განიხილა და პერსონალური მონაცემების დარღვევა ვერ დაინახა.