ადამიანი უფლებების სწავლებისა და მონიტორინგის ცენტრი მიიჩნევს, რომ შინაგან საქმეთა სამინისტრო მზად არ არის პოეტ ზვიად რატიანის საქმეზე უპასუხოს სისტემაში ადამიანის უფლებების დარღვევას. ასე გამოეხმაურა არასამთავრობო ორგანიზაცია შს მინისტრის, გიორგი გახარიას კომენტარს, რომლის თქმითაც, ის არცერთი წუთით არ ნანობს იმას, რაც მაშინ მოხდა.

"ნათელია, რომ ამ საქმეში მინისტრი და უწყება მუდმივად არაღიარების პოზიციაში იყო და მსხვერპლის დემონიზების ტაქტიკით მოქმედებდა. სამინისტრო არცერთ ეტაპზე არ აჩვენებდა რესურსს, ემოქმედა ზვიად რატიანის ღირსების დაცვის ინტერესების გათვალისწინებით", — წერია განცხადებაში.

განცხადებაში აღნიშნულია, რომ უწყებისა და მინისტრის მხრიდან მუდმივად ხაზგასმა ზვიად რატიანის არაფხიზელ მდგომარეობასა და პოლიციასთან ურთიერთობისას გამოყენებულ ლექსიკაზე საზოგადოების სოლიდარობის შესუსტებას ემსახურება. სასამართლომ და პროკურატურამ ზვიად რატიანს დაზარალებულის სტატუსი არ მიანიჭა. არასამთავრობო ორგანიზაცია მისი სახელით ადამიანის უფლებათა ევროპულ სასამართლოსთვის მიმართვას გეგმავს.

"სამწუხაროა, რომ ზვიად რატიანის უფლებების დარღვევის მძიმე ფაქტებს ქვეყნის მართლმსაჯულების სისტემის ვერცერთმა რგოლმა ვერ უპასუხა და დაზარალებული პრაქტიკულად უფლების აღდგენის მექანიზმების გარეშე დატოვა", — ნათქვამია განცხადებაში.

ზვიად რატიანის საქმე

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ, სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 2017 წლის 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

საზოგადოებრივმა მაუწყებლის თვთრეგულირების მექანიზმის სააპელაციო საბჭომ პირველ მარტს რატიანის ვიდეოს მათ ეთერში გავრცელების საკითხი განიხილა და პერსონალური მონაცემების დარღვევა ვერ დაინახა.

2018 წლის 2 მარტს პერსონალურ მონაცემთა დაცვის ინსპექტორმა პოეტ ზვიად რატიანის ვიდეოს გასაჯაროების გამო შინაგან საქმეთა სამინისტრო სამართალდამრღვევად სცნო და 2 000 ლარით დააჯარიმა.

რატიანმა ინციდენტის შემდეგ ქვეყანა დატოვა. რატიანმა შინაგან საქმეთა სამინისტროს მხრიდან მორალური ზიანის ანაზღაურების მოთხოვნით სასამართლოს მიმართა.