"ჩემო ძვირფასო თელა!" - ასე იწყება ხისთვის გაგზავნილი ერთ-ერთი წერილი. ავტრალიის ქალაქ მელბურნში გარემოს დაცვის ერთ-ერთი პროგრამის მიხედვით, ხეებს ID ნომრები მიანიჭეს და ელ-ფოსტის მისამართი შეუქმნეს, რათა მოქალაქეებს ადვილად შეძლებოდათ საშიშროების (მაგალითად, მოტეხვის პირას მყოფი ტოტების) დაფიქსირება, თუმცა მელბურნელები ამით არ დაკმაყოფილდნენ: ისინი ხეებს ესალმებიან, გულს უშლიან, აქებენ, სასიყვარულო წერილებს სწერენ და ასე შემდეგ...

მელბურნის გარემოს დაცვის თავმჯდომარე, არონ ვუდი აღნიშნავს, რომ ეს წერილები ცხადყოფს, რამდენად მნიშვნელოვანია მელბურნის მაცხოვრებლებისთვის თითოეული ხე.

ეს იმ წერილების ნაწილია, რომლებსაც ხეები ყოველდღიურად იღებენ:

"როცა წმინდა მარიამის სახელობის კოლეჯიდან გამოვედი, შენთან შევჩერდი, არა შენი საშიში ტოტების გამო, არამედ - შენი სილამაზის გამო. ესეთი მესიჯები ხშირად უნდა მიიღო, ისეთი მშვენიერი ხე ხარ"

გაგზავნილი წერილების მიზანი ხან ბანალური მისალმებაა, ხანაც - ეგზისტენციალური მონოლოგის წარმართვა.

საქალაქო თვითმმართველობის ოფიციალურმა პირებმა რამდენიმე ასეთი წერილი გამოაქვეყნეს:

თელას, ხის ID 1037148

21 მარტი, 2015

ძალიან ვწუხვარ, რომ მალე მოკვდები. მაღელვებს, რომ სატვირთო მანქანები შენს დაბლა ჩამოკიდებულ ტოტებს აზიანებენ. შენც ისეთივე დაღლილი ხარ ამით, როგორც ჩვენ?

ზოგ შემთხვევაში ხეებს წერილებს არამელბურნელებიც წერენ. ერთ-ერთი წერილი კი აშშ-ში "მცხოვრები" ხის პერსპექტივიდან იყო დაწერილი.

მუხას, ხის ID 1070546

11 თებერვალი, 2015

როგორ ხართ?

ისე გეკითხებით.

მე თეთრი მუხა ვარ. მაგრამ შეგიძლიათ, უბრალოდ მუ დამიძახოთ. დაახლოებით 350 წლის ვარ და აშშ-ში, მისისიპის პატარა ფერმაში ვცხოვრობ. ჩემი სიმაღლე 80 ვერსია. ხოლო სიგანეში 16 ვერსი ვარ. ბევრს არ ვმოგზაურობ (პრინციპში არც გავნძრეულვარ, რაც რკოები გავზარდე) უბრალოდ ვდგავარ და ჩიტებსა და ციყვებს დასასვენებელ ადგილს ვთავაზობ.

მშვიდობიან დღეს გისურვებთ!

მუ

მელბურნის "მისწერე ხეს" ერთ-ერთი სერვისია იმ მუნიციპალური პროექტებიდან, რომლებიც ქალაქის შეუფერხებლად განვითარებისთვის შეიქმნა. ჩიკაგოში ამის მაგალითი Pothole tracker-ია (ორმოების დასაფიქსირებლად), ხოლო ჰონოლულუში ცუნამის შემატყობინებელი სირენების "გაშვილების" პროგრამა.

ფოთლოვან თელას, ხის ID 1022165

ძვირფასო ფოთლოვანო თელა,

ვიმედოვნებ, მოგწონს წმინდა მარიამის სახელობის ტერიტორიაზე ცხოვრება. ხშირ შემთხვევაში, მეც მომწონს ხოლმე. გამოცდები ახლოვდება და ახლა წესით უნდა ვმეცადინეობდე. შენ არ გაქვს გამოცდები, იმიტომ, რომ ხე ხარ. არამგონია, კიდევ გვქონდეს რაიმე სალაპარაკო, რადგან საერთო ბევრი არაფერი გვაქვს, ისევ იმიტომ, რომ ხე ხარ. თუმცა მიხარია, რომ ამ პროცესში ჩვენ ერთად ვართ.

გაგვიმარჯოს,

ეფი

29 მაისი, 2015

ზოგ შემთხვევაში ხეები პასუხსაც აბრუნებენ:

გამარჯობა ეფ,

მეც მომწონს აქ ცხოვრება.

იმედია, კარგად ჩაიარა გამოცდებმა. კვლევამ აჩვენა, რომ ბუნებას ადამიანების სწავლაზე პოზიტიური ზეგავლენის მოხდენა შეუძლია. ასე რომ, ვიმედოვნებ, შენი სწავლის ინსპირაცია ვიქნები.

საუკეთესო სურვილებით,

ფოთლოვანი თელა

მაგალითად, ასეთს:

ტირიფს, ხის ID 1357982

გამარჯობა ბატონო ტირიფო! ან იქნებ ქალბატონი ტირიფი ხარ?

ხეებს აქვთ გენდერი?

იმედი მაქვს, დღეს მზიანმა ამინდმა გასიამოვნა.

პატივისცემით,

ელი

30 იანვარი, 2015

ხის პასუხი:

გამარჯობა,

მე არც ბატონი ვარ, არც ქალბატონი, რადგან ჩემი ყვავილებს თავიანთ სტრუქტურაში ორივე გენდერი აქვთ. ამ ტერმინს ერთსახლიანი მცენარეები ჰქვია. ხის ზოგ ჯიშს მხოლოდ მამრობითი ან მდედრობითი სქესის ყვავილები აქვთ, მათ ორსახლიანი მცენარეები ეწოდებათ. ზოგს კი - ორივე ერთად აქვს. ეს ყველაფერი ძალიან დამაბნეველია და თან გასაოცარიც კი, როგორი მრავალფეროვანი და კომპლექსური შეიძლება ვიყოთ ჩვენ.

კეთილი სურვილებით,

ბატონი და ქალბატონი ტირიფი

კიდევ ერთი წერილი ხეს

დასავლეთის წითელ კედარს, ხის ID 1058295

1 ივლისი, 2015

გამარჯობა ხეო,

ისე, ნერვიულობ საბერძნეთის კრიზისზე? შენი აზრით, საბერძნეთი უნდა დარჩეს ევროკავშირში?

საუკეთესო სურვილებით,

ტროი

და ისევ პასუხი ხისგან

2 ივლისი, 2015

გამარჯობა ტროი,

როგორც მახსოვს, ბერძნებმა ერთხლე დაგანგრიეს - ისევ გაბრაზებული ხარ მათზე?

საბერძნეთი ჯერ არ განიცდის ხეების ნაკლებობას, თუმცა, შეიძლება გამოვიდეს ევროკავშირიდან. ზოგი ამბობს, რომ მათ უფლება უნდა მიენიჭოთ, თავიანთი ვალიუტა გააუფასურონ, რათა ეკონომიკა აღადგინონ, მაგრამ ევროკავშირი ამას არ დაანებებს ბერძნებს. ზოგი კიდევ ამბობს, რომ ეს გარკვეულწილად მკაცრი პროგრამაა, რამაც აქამდე მოიყვანა საბერძნეთი. ისინი ფიქრობენ, რომ სწორედ ეს მკაცრი ეკონომიკა შეეხო რუსეთს საბჭოთა კავშირის დაშლის შემდეგ და აზიასაც გლობალური ფინანსური კრიზისის კუთხით.

არ ვიცი, მე ხომ მხოლოდ ხე ვარ.

საუკეთესო სურვილებით,

დასავლეთის წითელი ტირიფი

"ძვირფასო 1037148, შენ მეტი ხარ, ვიდრე უბრალოდ ეს რიცხვები. მიყვარხარ, ყოველთვის და მუდამ." - წერს ერთ-ერთი რომანტიკოსი ფოთლოვან თელას.

საინტერესო იქნებოდა, როგორ წერილებს მისწერდნენ თბილისელები ხეებს:

შეგვიძლია, რამდენიმე მაგალითი წარმოვიდგინოთ: "ძვირფასო ჭადარო, ძალიან მიყვარხარ, მაგრამ შენი ბუსუსების გამო ალერგია მეწყება. არ გეწყინოს, უბრალოდ არ შემეძლო, არ მეთქვა" ან "საყვარელო ფიჭვო, ვეცდები, ჭირში და ლხინში შენთან ვიყო, სანამ დეველოპერები არ დაგვაშორებენ".