პოლიტიკაში მყოფი ქალების პირადი ცხოვრების ამსახველი კადრების გავრცელებით დისკრედიტაცია მესიჯია არა მხოლოდ მათთვის, არამედ პოლიტიკაში მოსვლის მსურველი სხვა ქალებისთვისაც, რომ "კიდევ ერთხელ დაფიქრდნენ". ასე გამოეხმაურა კავშირი საფარის ხელმძღვანელი, ბაია პატარაია დღეს, 28 იანვარს კიდევ ერთი ქალი პოლიტიკოსის წინააღმდეგ გავრცელებულ ჩანაწერებს.

"პირადი ცხოვრების ჩანაწერებს ქალების წინააღმდეგ პოლიტიკურ იარაღად იყენებენ. ეს ეფუძნება იმას, რომ სექსუალური თავისუფლება და ქალებისთვის პირადი ცხოვრების ქონა ტაბუიერებულ თემად მიიჩნევა. ითვლება, რომ საქართველოში ქალის "გაფუჭება" ძალიან მარტივია", — აღნიშნავს პატარაია On.ge-სთან.

მისი თქმით, დისკრედიტაციისა და რეპუტაციის შელახვის მიზნით პირადი ცხოვრების ამსახველ კადრებს ძირითადად ქალებისა და გეების წინააღმდეგ იყენებენ, რადგან "საზოგადოებაში მათი სექსუალობა გაკიცხვის საგანია". მისივე თქმით, მსგავსი სახის შანტაჟი ჰეტეროსექსუალ კაცებზე არ მოქმედებს, რადგან მიიჩნევა, რომ მათ შეიძლება ჰქონდეთ "მრავალფეროვანი" პირადი ცხოვრება.

ის ამბობს, რომ მმართველი პარტიის წევრის, ეკა ბესელიას წინააღმდეგ ჩანაწერები მაშინ გამოჩნდა, როდესაც მას ხელისუფლებასთან პრობლემები შეექმნა. ის ამაში სახელმწიფო უსაფრთხოების სამსახურის კვალს ხედავს.

დღეს, 28 იანვარს სოციალურ ქსელებში პოლიტიკოსის პირადი ცხოვრების ამსახველი კადრების გავრცელების შესახებ ინფორმაცია დეპუტატ დავით ჭიჭინაძისგან გახდა ცნობილი. შინაგან საქმეთა სამინისტროს ინფორმაციით, პოლიტიკოსის საჯარო განცხადების საფუძველზე კანონით დადგენილ ფარგლებში სამართლებრივ რეაგირებას მოახდენენ.

ეს პირველი შემთხვევა არაა, როცა ინტერნეტში პოლიტიკოსი ქალების პირადი ცხოვრების ამსახველი კადრების გავრცელებაზეა საუბარი. 2016 წლის 11 მარტში ერთ-ერთი პოლიტიკური პარტიის ლიდერისა და ყოფილი მინისტრის პირადი ცხოვრების ამსახველი მასალა გავრცელდა. მალევე, 14 მარტს მუქარის შემცველი ვიდეოკადრები გავრცელდა. ვიდეომასალა მოქმედი ჟურნალისტებისა და პოლიტიკოსების მიმართ ჩანაწერების გავრცელების მუქარას შეიცავდა, თუ ისინი არ დატოვებდნენ თანამდებობებს.