დღეს, 27 იანვარს არასამთავრობო ორგანიზაციებისა და მოქალაქეების ნაწილი სასამართლო სისტემაში რეალური ცვლილებების მოთხოვნით საპროტესტო აქციას მართავენ. პროტესტის ადგილად რედისონ ბლი ივერია შეირჩა, სადაც ამავე დღეს იმ სამუშაო ჯგუფის შეხვედრა იმართება, რომელიც უზენაესი სასამართლოს მოსამართლეების არჩევის კრიტერიუმებზე იმუშავებს. არასამთავრობო ორგანიზაციების ნაწილმა პროტესტის ნიშნად თქვა უარი სამუშაო ჯგუფის მუშაობაში ჩართვაზე.

"პარლამენტარები, იუსტიციის საბჭოს წევრები და მოსამართლეთა გავლენიანი ჯგუფის წარმომადგენლები იკრიბებიან უზენაესი სასამართლოს მოსამართლეების შერჩევის პროცედურების განსახილველად. ხელისუფლება სამუშაო ჯგუფში ჯდება იმ ადამიანებთან ერთად, რომლებიც ცდილობდნენ, ამ ქვეყნისთვის უვადოდ მიესაჯათ უსამართლო და მორჩილი მოსამართლეები უზენაეს სასამართლოში", — აცხადებდნენ ორგანიზატორები აქციის დაანონსების დროს.

მათივე თქმით, საქართველოს პარლამენტის თავმჯდომარის მიერ შემუშავებული სამუშაო ფორმატი ცრუ და არაფრისმომცემია.

"ასეთი ფორმატები საზოგადოებრივი პროტესტის შესუსტებასა და კოსმეტიკური ცვლილებებით, იმავე ჯგუფის ინტერესების გატარებას ემსახურება", — განმატავდნენ ისინი.

ფოტო: ანა ვახტანგაძე / On.ge

რამდენიმე დღის წინ საქართველოს პარლამენტის თავმჯდომარემ, ირაკლი კობახიძემ იუსტიციის უმაღლესი საბჭოს მდივნათან, გიორგი მიქაუტაძესთან შეხვედრის შემდეგ განაცხადა, რომ უზენაესი სასამართლოს მოსამართლეებს იქამდე არ აირჩევენ, სანამ კანდიდატების შერჩევისა და წარდგენის კრიტერიუმები არ გაიწერება. მან ასევე განმარტა, რომ შემუშავებული კრიტერიუმები იმ მოსამართლეობის კანდიდატებზეც გავრცელდება, რომელთა სიაც უკვე პარლამენტშია. ირაკლი კობახიძის თქმით, კანდიდატების შერჩევის კრიტერიუმებსა და პროცედურებზე სასამართლო რეფორმის სამუშაო ჯგუფში იმსჯელებენ.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ. გიორგი მიქაუტაძის თქმით, ყველა მოსამართლე მზად არის გაიაროს ის კრიტერიუმები, რომელსაც პარლამენტი შეიმუშავებს.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

ამავე თემაზე: