კვირას, რუსეთის შორეულ აღმოსავლეთში, კამჩატკის რეგიონში, 7.4 მაგნიტუდის მიწისძვრა მოხდა, განაცხადეს მიწისძვრების მონიტორინგის სააგენტოებმა, ხოლო რუსეთის საგანგებო სიტუაციების სამსახურები რეგიონში შესაძლო ცუნამის ტალღებს აკვირდებიან. ინფორმაციას Reuters ავრცელებს.

გერმანიის გეომეცნიერებების კვლევითი ცენტრის (GFZ) მონაცემებით, მიწისძვრა კამჩატკის აღმოსავლეთ სანაპიროზე 10 კილომეტრის სიღრმეზე მოხდა.

ევროპის ხმელთაშუა ზღვის სეისმოლოგიურმა ცენტრმა (EMSC) მიწისძვრის სიმძლავრე 7.4 მაგნიტუდად აჩვენა. GFZ-მ ასევე განაახლა მიწისძვრის სიმძლავრე 7.4 მაგნიტუდამდე, მას შემდეგ, რაც პირველად 6.7 მაგნიტუდის შესახებ ინფორმაცია გავრცელდა.

რუსეთის სახელმწიფო საინფორმაციო სააგენტო TASS-მა კვირას, ადგილობრივ საგანგებო სიტუაციების სამსახურებზე დაყრდნობით, განაცხადა, რომ 60 სმ-მდე სიმაღლის ტალღებმა შესაძლოა კომანდორის კუნძულებზე იშვიათად დასახლებულ ალეუტის რაიონს მიაღწიოს.

აღმოსავლეთ კამჩატკაში, უსტ-კამჩატსკის რეგიონს შესაძლოა 40 სმ-მდე სიმაღლის ტალღები დაატყდეს თავს, ხოლო პეტროპავლოვსკ-კამჩატსკის ურბანულ რაიონში - ნახევარკუნძულის სამხრეთ-აღმოსავლეთ ნაწილში ყველაზე მჭიდროდ დასახლებულ ტერიტორიაზე, სადაც რეგიონის დედაქალაქი მდებარეობს - შესაძლოა 15 სმ-მდე სიმაღლის ტალღები იყოს.