შაბათს, ვიეტნამის ჩრდილოეთით, კუანგ ნინის პროვინციაში, ჰალონგის ყურეში ტურისტული ნავის ჩაძირვის შედეგად დაღუპულთა რიცხვი 38-მდე გაიზარდა. ამის შესახებ ინფორმაციას Reuters წერს.

გემი, რომლის ბორტზეც 48 ტურისტი და ეკიპაჟის ხუთი წევრი იმყოფებოდა, შაბათს შუადღისას ჩაიძირა, რაც პოპულარულ ტურისტულ ზონაში ბოლო წლების ერთ-ერთი ყველაზე მძიმე ავარიაა

"ბორტზე მყოფი სულ მცირე 38 ადამიანი დაღუპულია და 10 გადარჩენილია", — ნათქვამია ვიეტნამის მთავრობის მიერ გავრცელებულ განცხადებაში.

ვიეტნამის ოფიციალური საინფორმაციო სააგენტო იტყობინება, რომ ყველა ტურისტი ვიეტნამელი იყო, მათ შორის რამდენიმე ბავშვი.

Reuters-ის ცნობით, ადგილზე მობილიზებულია ათობით მაშველი, მათ შორის სასაზღვრო დაცვის თანამშრომლები, საზღვაო ძალების თანამშრომლები, პოლიციელები და პროფესიონალი მყვინთავები. მიუხედავად იმისა, რომ ზღვა დაწყნარდა, ამინდის პირობები ხილვადობას ზღუდავდა, რაც სამაშველო ოპერაციებს ართულებდა.

ავარია შაბათს, ადგილობრივი დროით დაახლოებით 14:00 საათზე (07:00 GMT) მოხდა.

ვიეტნამის ვიცე პრემიერმინისტრის, ტრან ჰონგ ჰას ხელმძღვანელობით, კუანგ ნინის პროვინციის ხელისუფლებამ სამაშველო ოპერაციის მხარდასაჭერად ოთხი დიდი გემი და სამაშველო ძალა გაგზავნა.

ადგილობრივი მედია VnExpress-ის ცნობით, სამაშველო ჯგუფები ამჟამად დაკარგული ადამიანების ძებნაში არიან ჩართულნი, რადგან ტერიტორიას ტაიფუნ "ვიფა" უახლოვდება.