სომხეთის პრემიერმინისტრმა, ნიკოლ ფაშინიანმა საკუთარ სოციალურ ქსელში განცხადება გამოაქვეყნა, სადაც სომხეთის სამოციქულო ეკლესიის პატრიარქს, გარეგინ II-ს კვლავ უქორწინობის აღთქმასთან დაკავშირებით აკრიტიკებს.

"კომპანია "ასტრონომერის" აღმასრულებელმა დირექტორმა, რომელიც ცოლის ღალატში გამოიჭირეს, თანამდებობა დატოვა, რადგან "ასტრონომერის" კონცეფციის თანახმად, ოჯახური ღირებულებები ფუნდამენტურია.

სომხეთის სამოციქულო ეკლესიის სწავლების თანახმად, მონაზონი მღვდელი ეკლესიაზე ქორწინდება და არ აქვს უფლება ჰქონდეს სხვა პირადი ურთიერთობა.

ეკლესიასთან ქორწინების აღთქმის დარღვევის შემდეგ, კტრიჯ ნერსისიანმა არ დატოვა მონასტერი, რითაც შეურაცხყო ჩვენი უწმინდესობის სალოცავი, დედა საკათედრო ტაძარი.

ამით კტრიჯ ნერსისიანი მოგვიწოდებს ჩვენ, სომხური სამოციქულო წმინდა ეკლესიის ერთგულ მიმდევრებს, გავათავისუფლოთ მონასტერი მისგან.

ჩვენ ამას ერთად გავაკეთებთ. მოემზადეთ.

ვეჰარან ვეჰი," — დაწერა ნიკოლ ფაშინიანმა.

ცნობისთვის, Coldplay-ის კონცერტზე, რომელიც 16 ივლისს გაიმართა, კომპანია "ასტრონომერის" აღმასრულებელი დირექტორი ენდი ბაირონი Kiss Cam კამერამ დააფიქსირა, როდესაც კომპანიის ადამიანური რესურსების ხელმძღვანელს, კრისტინ კაბოტს კოცნიდა. ვიდეო ინტერნეტში ვირუსულად გავრცელდა და სკანდალიც მოჰყვა, რადგან ბაირონი დაქორწინებულია.

მომხდარის შემდეგ, "ასტრონომერის" სამეთვალყურეო საბჭომ დაიწყო გამოძიება და ორივე მენეჯერი დროებით გაათავისუფლა მოვალეობებიდან. 19 ივლისს ბაირონი აღმასრულებელი დირექტორის პოსტიდან გადადგა. კომპანიამ აღნიშნა, რომ მან ვერ დაიცვა ორგანიზაციის ეთიკური პრინციპები.