შაბათს დილით, ლოს-ანჯელესის ღამის კლუბთან მანქანა ხალხში შევარდა, რის შედეგადაც მინიმუმ 30 ადამიანი დაშავდა. ქალაქის პოლიციისა და სახანძრო სამსახურების თქმით, მძღოლს თვითმხილველები დაესხნენ თავს და ესროლეს. ინფორმაციას Reuters ავრცელებს.

სახანძრო სამსახურის ონლაინ განცხადებაში ნათქვამია, რომ სულ მცირე შვიდი ადამიანი კრიტიკულ მდგომარეობაშია, ხოლო ექვსი მძიმედ დაშავდა. ინციდენტი, რომელიც კლუბ "ვერმონტის" გარეთ ადგილობრივი დროით დილის 2 საათამდე (09:00 GMT) მოხდა.

ABC News სახანძრო სამსახურის წარმომადგენელს, კაპიტან ადამ ვანგერპენს ციტირებს და წერს, რომ მანქანა, სავარაუდოდ, ჯერ კლუბის გარეთ მდებარე სატვირთო მანქანას, შემდეგ კი მომსახურების პუნქტს და ხალხის დიდ ჯგუფს შეეჯახა.

ლოს-ანჯელესის პოლიციის დეპარტამენტმა X-ზე განაცხადა, რომ ჯერ კიდევ იძიებს — რატომ შევარდა მძღოლი ხალხში.

პოლიციის ცნობით, ოფიცრებმა დაადგინეს, რომ მძღოლს თვითმხილველებმა თავდასხმის დროს ესროლეს. არსებული ინფორმაციით ის საავადმყოფოში გადაიყვანეს. მისი მდგომარეობა უცნობია.

პოლიციის ცნობით, მძღოლის სროლაში ეჭვმიტანილი მამაკაცი შემთხვევის ადგილიდან ფეხით გაიქცა და სავარაუდოდ რევოლვერით იყო შეიარაღებული.