"კობახიძეც ადასტურებს, რომ ლილუაშვილი, ღარიბაშვილი, გომელაური — ყველა ჩემთან თანამშრომლობს, ყველას ინფორმაციები მოაქვს" — ასე ეხმაურება ერთიანი ნაციონალური მოძრაობის პოლიტსაბჭოს თავმჯდომარე ლევან ხაბეიშვილი ოცნების პრემიერის, ირაკლი კობახიძის განცხადებას, რომ ოცნების ყოფილი წევრი, რომლის ვინაობასაც არ ამხელს, კორუფციაშია მხილებული და ლევან ხაბეიშვილს "აფინანსებდა".

ლევან ხაბეიშვილის განცხადებით, ოცნებაში მწვავე დაპირისპირებაა. მისი თქმით, "ის, რასაც ჩვენ დღეს ვხედავთ, არის მარტივი რამის დადასტურდება: უახლოეს დღეებში დაიჭერენ ან ლილუაშვილს, ან ღარიბაშვილს, ან გომელაურს".

"დანასისხლად არიან გადაკიდებული გომელაურ-ლილუაშვილ-ღარიბაშვილთან. ისინი ამ ისტერიკით ადასტურებენ ერთ რამეს: შიგნით აქვთ უბედურება დაჭმა და მეტი ინფორმაცია მაქვს თუ არა? კიდევ უფრო მეტი მაქვს, ვიდრე მათ წარმოუდგენიათ. ის, რასაც ჩვენ დღეს ვხედავთ, არის მარტივი რამის დადასტურდება: უახლოეს დღეებში დაიჭერენ ან ლილუაშვილს, ან ღარიბაშვილს, ან გომელაურს.

ბატონო ბიძინა, მარტო დარჩებით, ხომ ხვდებით? ხომ ხედავთ? კობახიძეც ადასტურებს, რომ ლილუაშვილი, ღარიბაშვილი, გომელაური — ყველა ჩემთან თანამშრომლობს, ყველას ინფორმაციები მოაქვს. თქვენ ხომ ხვდებით, რომ დარჩებით მიქანაძის, ოხანაშვილის და ამ შეშლილი კობახიძის ამარა. ღარიბაშვილზე ვთქვი — მიქაუტაძე დაუჭირეთ, მისი ჯიბე. გომელაურის გადადგომა ვთქვი — ორ დღეში გადადგა. რიჟვაძეზე ვთქვი — ფაქტობრივად კლავდით, ან თავს იკლავდა. ბიზნესზე ვთქვი — "ზარალადან" დაწყებული პაპაშვილით გაგრძელებული და ჩხაიძეს, საერთოდ, შვილი დაუჭირეთ. რომელი ერთი მოვყევი და არ დადასტურდა? ლილუაშვილს ვთქვი, რომ 100 მლნ დოლარს სთხოვთ, ოხანაშვილმა აგერ თქვა, რომ დიახ, გამოძიებას მასთან კითხვები აქვს. ამიტომ, თქვენ აბსოლუტურად მარტო დარჩებით ამ შეშლილების ამარა," — განაცხადა ლევან ხაბეიშვილმა ტელეკომპანია "პირველთან".

დღეს ჟურნალისტებთან საუბრისას ირაკლი კობახიძემ ჟურნალისტებს განუცხადა, რომ ქართული ოცნების ჯგუფის ყოფილი წევრი კორუფციაშია მხილებული და დასძინა, რომ ეს პირი ლევან ხაბეიშვილს "აფინანსებდა". ჟურნალისტების კითხვაზე თუ ვინ არის ეს პირი, ოცნების პრემიერმა განაცხადა, რომ "უდანაშაულობის პრეზუმფციას" იცავს და მის ვინაობას არ დაასახელებს.

"მე არ დავაკონკრეტებ. გამოძიებამ უნდა დაადგინოს. მე იმიტომ არ ვსაუბრობ სახელებით და გვარებით, რომ ვიცავ უდანაშაულობის პრეზუმფციას. როდესაც საუბარია კორუფციასთან დაკავშირებულ ეჭვებზე, გამოძიება უნდა დაიწყოს შესაბამისმა უწყებამ. მე იმედი მაქვს, რომ სადაც იქნება საფუძვლიანი ეჭვი ყველგან დაიწყება გამოძიება", — თქვა კობახიძემ.