უკრაინის პრეზიდენტის, ვოლოდიმირ ზელენსკის თქმით, უკრაინამ რუსეთს შემდეგი შეხვედრა მომავალ კვირას შესთავაზა. ამის შესახებ მან ვიდეომიმართვაში განაცხადა.

უკრაინის პრეზიდენტმა ასევე აღნიშნა, რომ ლიდერთა დონეზე შეხვედრა აუცილებელია, რათა რეალური და ხანგრძლივი მშვიდობა იყოს უზრუნველყოფილი.

"რუსულ მხარესთან გაცვლების შესახებ მოლაპარაკება გრძელდება — ვაგრძელებთ სტამბოლში ბოლო შეხვედრის დროს მიღწეული შეთანხმებების შესრულებას. ამჟამად გუნდი კიდევ ერთ გაცვლაზე მუშაობს.

ასევე, ეროვნული უსაფრთხოების და თავდაცვის საბჭოს მდივანმა უმეროვმა შემატყობინა, რომ რუსულ მხარეს შემდეგი შეხვედრა მომავალ კვირას შესთავაზა. მოლაპარაკებების დინამიკა უნდა გაიზარდოს. ყველაფერი უნდა გავაკეთოთ ცეცხლის შეწყვეტის მისაღწევად. რუსულმა მხარემ გადაწყვეტილებებისთვის თავის არიდება უნდა შეწყვიტოს.

ტყვეების გაცვლა. ბავშვების დაბრუნება. მკვლელობების შეწყვეტა და ლიდერთა დონეზე შეხვედრა საჭიროა, რათა რეალურად უზრუნველვყოთ მშვიდობა — ნამდვილად ხანგრძლივი. უკრაინა მზად არის ასეთი შეხვედრისთვის", — თქვა ვოლოდიმირ ზელენსკიმ