სომხეთის პრემიერმინისტრი, ნიკოლ ფაშინიანი სომხეთის სამოციქულო ეკლესიის პატრიარქის, გარეგინ II-ის ეჩმიაძინიდან გამოსახლებას აანონსებს. ამის შესახებ მან თავის ტელეგრამ-არხზე დაწერა.

მისი თქმით კათოლიკოსმა დედა ეკლესია უქორწინობის აღთქმის დარღვევით შეურაცხყო, ამიტომ მისი გაძევება აუცილებელია.

"ერთად გავაკეთებთ ამას. მოემზადეთ," — დაწერა ფაშინიანმა.

ფაშინიანსა და ეკლესიას შორის დაძაბულობამ პიკს მას შემდეგ მიაღწია, რაც ფაშინიანმა მაისის ბოლოს განაცხადა, რომ ეკლესიები "საწყობებად" იქცა და რომ სასულიერო პირები თავიანთ უბიწოების აღთქმას არღვევენ. ასევე, ფაშინიანმა გარეგინ II შვილის ყოლაში დაადანაშაულა.

ფაშინიანის თქმით, მან ეს საკითხი იმიტომ წამოჭრა, რომ როგორც სომხეთის სამოციქულო ეკლესიის მორწმუნემ დაინახა "სულიერი უსაფრთხოებისთვის შექმნილი საფრთხე", ხოლო როგორც პრემიერმინისტრმა – "ეროვნული უსაფრთხოებისთვის შექმნილი საფრთხე".

ფაშინიანის ბრალდებების შემდეგ, მთავრობასთან დაკავშირებულმა მედიასაშუალებებმა გარეგინ II-ის სავარაუდო შვილის ფოტო და სახელი გაავრცელეს.