ქართული ოცნების განათლების, მეცნიერებისა და ახალგაზრდობის მინისტრმა, გივი მიქანაძემ კითხვაზე "აქვს თუ არა სადოქტორო დისერტაცია ამსტერდამის თავისუფალ უნივერსიტეტში დაცული," ჟურნალისტს უპასუხა, რომ ის "საცოდავი და უსუსურია".

"ძალიან სასაცილოები ხართ, მართლა ძალიან სასაცილოები ხართ, იმდენად უსუსურები ხართ. რა დიპლომზეა საუბარი? დოქტორანტი კანდიდატი... ეს თქვენ შეგიძლიათ ჩემს ნებისმიერ CV-ში ამოიკითხოთ. ძალიან სასაცილოები ხართ. როგორი უსუსურები ხართ იცით? ირაკლი კობახიძეს არაფერი არ მოუტყუებია. ირაკლი კობახიძემ თქვა, რომ ამსტერდამის თავისუფალი უნივერსიტეტის დოქტორანტიაო. იცით როგორი უსუსურები ხართ? მართლა სასაცილოები ხართ!," — თქვა მიქანაძემ.

განმეორებით კითხვაზე აქვს თუ არა მას დოქტორის ხარისხი დაცული, მიქანაძემ უპასუხა — "არ მაქვს".

"ვაპირებ თუ არა სწავლის გაგრძელებას? როგორ ფიქრობთ მცალია? ძალიან დაკავებული ვარ. თქვენნაირი მოცლილი ასეთ უაზრობაზე... ძალიან უხერხულია... თქვენ ვერ მაჩვენებთ ვერცერთ ჩემს ბიოგრაფიულ რეზიუმეს, სადაც წერია, რომ მე მაქვს ხარისხი დაცული. ირაკლი კობახიძეს არ მოუტყუებია. იქ წერია კანდიდატი, და კანდიდატი შეიძლება აღქმული იყოს, როგორც, ასე ვთქვათ, დაცული. ეს არის ძალიან ტექნიკური საკითხი. თქვენ თუ ჩემს განათლებაში შეგაქვთ ეჭვი, ეს თქვენი საკითხია. იმაზე რატომ არ მეკითხებით ესექსის უნივერსიტეტში რომ მაქვს დაცული სამაგისტრო ხარისხი? საერთოდ არაფერზე ქმნით რაღაცას. საკუთარ თავს ჰკითხეთ, რაზე გიწევთ თქვენი პატარა აუდიტორიის კვება?!" — თქვა მიქანაძემ.

ცნობისთვის, ირაკლი კობახიძემ გივი მიქანაძეს განათლების მინისტრის პოზიციაზე წარდგენისას განაცხადა, რომ მას "სადოქტორო დისერტაცია ამსტერდამის თავისუფალ უნივერსიტეტში აქვს დაცული". Oc media-ს ინფორმაციით, მიქანაძის საჯაროდ ხელმისაწვდომ ბიოგრაფიაში, რომელიც განათლების სამინისტროს ვებსაიტზეა განთავსებული — სადაც მისი ნიდერლანდების დოქტორის ხარისხი არ არის ნახსენები — ნათქვამია, რომ 2013 წელს იყო ამსტერდამის თავისუფალი უნივერსიტეტისა და ნიდერლანდების დანაშაულისა და ძალოვანი სტრუქტურების კვლევითი ცენტრის (ნიდერლანდები) მკვლევარი.

ბიოგრაფიაში ასევე მითითებულია, რომ მიქანაძე 2025 წლის მდგომარეობით გრიგოლ რობაქიძის უნივერსიტეტის დოქტორანტია.

თუმცა, ინსტიტუტის წარმომადგენელმა OC Media-ს განუცხადა, რომ მიუხედავად იმისა, რომ მიქანაძე 2010-იანი წლების შუა პერიოდში ამსტერდამის თავისუფალ უნივერსიტეტში არარეზიდენტ დოქტორანტად იყო რეგისტრირებული, მას დოქტორანტურა არასოდეს დაუმთავრებია. წყაროს თქმით, მან საქართველოში სამუდამო პატიმრობის პირობითი ზედამხედველობის შესახებ დისერტაციის მხოლოდ რამდენიმე თავი წარადგინა.

ცნობისთვის, გივი მიქანაძე იუსტიციის მინისტრის მოადგილის თანამდებობას 2005-2008 წლამდე იკავებდა. 2006 წლის "ციხის ბუნტის" დროს, რომელსაც 7 პატიმრის სიცოცხლე შეეწირა, იუსტიციის მინისტრის მოვალეობებს ასრულებდა. ამ დროს იუსტიციის სასჯელაღსრულების დეპარტამენტის უფროსი ბაჩო ახალაია იყო.