საჯარო მოსამსახურეთა დამოუკიდებელი პროფესიული კავშირი კონსტიტუციის 78-ე მუხლი უვიზო მიმოსვლის შესაძლო შეჩერებასთან დაკავშირებით სოციალურ ქსელში განცხადებას ავრცელებს.

განცხადებაში კონსტიტუციის 78-ე მუხლი წერს, რომ ევროინტეგრაციის გზაზე ევროპის ქვეყნებში უვიზო მიმოსვლის მოპოვება ერთ-ერთი მნიშვნელოვანი ეტაპი იყო და რამდენიმე მნიშვნელოვანი რეფორმის საფუძველიც გახდა.

"2017 წელს, საქართველოს მოქალაქეებისთვის ევროპის ქვეყნებში უვიზო მიმოსვლის შესაძლებლობის მოპოვება ერთ-ერთი მნიშვნელოვანი ეტაპი იყო ევროინტეგრაციის გზაზე.

ეს შედეგი, რასაკვირველია, მხოლოდ პოლიტიკური ნების გამოხატულება არ ყოფილა. მის მიღწევაში გადამწყვეტი როლი შეასრულეს საჯარო მოსამსახურეებმა, რომლებმაც ქვეყნისა და საქმის ერთგულებითა და პროფესიონალიზმით განახორციელეს ქვეყნის წინსვლისა და განვითარებისთვის უმნიშვნელოვანესი რეფორმები.

ამ ძალისხმევის ფარგლებში:

1. გაძლიერდა სასაზღვრო კონტროლი, მოდერნიზდა სასაზღვრო ზოლი;

2. წარმატებით შემუშავდა მიგრაციის, მათ შორის, რეადმისიის პოლიტიკა;

3. მნიშვნელოვანი რეფორმები გატარდა პირადობის დამადასტურებელი დოკუმენტების უსაფრთხოების მიმართულებით: ამოქმედდა პირადობის ელექტრონული მოწმობები და ბიომეტრიული პასპორტები, შეიქმნა ბიომეტრიულ მონაცემთა ბაზები და განვითარდა მონაცემთა გაცვლის სისტემები ევროკავშირის სტანდარტების მიხედვით;

4. მნიშვნელოვანი საკანონმდებლო ცვლილებები განხორციელდა ადამიანის უფლებათა დაცვისა და ანტიდისკრიმინაციული პოლიტიკის გაძლიერების მიმართულებით.

ამ რეფორმების განხორციელებაზე მუშაობდნენ შს სამინისტროს, იუსტიციის სამინისტროს, საგარეო საქმეთა სამინისტროს, ეკონომიკის სამინისტროს და სხვა მნიშვნელოვანი უწყებების თანამშრომლები. შესაბამისად, ვიზალიბერალიზაცია წარმოადგენს წლების განმავლობაში, საჯარო სექტორში დასაქმებული პროფესიონალების შრომის შედეგს, რომლის დაკარგვა დაუშვებელია!" — წერია განცხადებაში.

დამოუკიდებელი პროფესიული კავშირი ყველა საჯარო მოსამსახურეს, რომელსაც მცირე წვლილი შეუტანია, ვიზალიბერალიზაციის პროცესში, მოუწოდებს დაიცვას საკუთარი შრომისა და ძალისხმევის შედეგი.

"დღეს, როდესაც მის შესაძლო შეჩერებაზე ვსაუბრობთ, უნდა გვახსოვდეს, რომ ეს ფუნდამენტი ათასობით საჯარო მოსამსახურის აშენებულია, რათა ჩვენი ქვეყნის ევროინტეგრაცია საბოლოოდ ქცეულიყო რეალობად.

ვიზალიბერალიზაცია საერთაშორისო ასპარეზზე საქართველოს მიმართ ნდობისა და მიღწეული პროგრესის შეფასებაა, მისი გაუქმება კი ნიშნავს არა მარტო მიღწეული შედეგის დაკარგვას, არამედ რამდენიმეწლიან ჩამორჩენას ევროინტეგრაციისა და ზოგადად, ქვეყნის განვითარების გზაზე.

მოვუწოდებთ ყველა საჯარო მოსამსახურეს, ვისაც თუნდაც უმცირესი წვლილი შეუტანია ამ პროცესში, დაიცვას საკუთარი შრომისა და ძალისხმევის შედეგი, რადგან ეს მიზანი ყოველგვარ პარტიულ ინტერესზე მაღლა დგას." — წერს სოციალურ ქსელში.