რუსეთის პრეზიდენტმა, ვლადიმერ პუტინმა უცხოურ მესენჯერებზე, მათ შორის WhatsApp-სა და Telegram-ზე კონტროლის დაწესების ბრძანება გასცა, მიუხედავად იმისა, რომ Telegram რუსული წარმოშობის პლატფორმაა — ამის შესახებ უკრაინის საგარეო დაზვერვის სამსახური იუწყება.

პუტინის დავალებით, 2025 წლის 1 სექტემბრამდე მთავრობამ ზომები უნდა შეიმუშაოს, რომლებიც უცხოური პროგრამებისა და "არამეგობრული ქვეყნების მიერ" შექმნილი მესენჯერების გამოყენებას შეზღუდავს.

RBC Ukraine-ის ცნობით, განსაკუთრებული ყურადღება WhatsApp-ზეს გამახვილებული, რომელიც Meta-ს ეკუთვნის — ორგანიზაციას, რომელიც რუსეთში ექსტრემისტულად არის გამოცხადებული და აკრძალულია.

ანგარიშში ასევე ნათქვამია: "Telegram-ის მდგომარეობა ბუნდოვანია: მიუხედავად მისი რუსული წარმოშობისა, პლატფორმის თითქოს "დამოუკიდებელი" პოზიცია და თანამშრომლობაზე უარი მის სტატუსს ართულებს."

რუსეთის ხელისუფლებამ ციფრული კონტროლისთვის ახალი მესენჯერი შექმნა — VK-ის Max. აპლიკაციის მონაცემები ავტომატურად გადადის VK-სთან დაკავშირებულ სერვერებზე, რომელიც რუსეთის სპეცსამსახურების კონტროლს ექვემდებარება.

"ყველა ოფიციალურ პირს მიეცა დავალება Max-ზე გადავიდეს. აპლიკაციას სრული წვდომა აქვს მიკროფონზე, კამერაზე, კონტაქტებზე, გეოლოკაციაზე და ფაილებზე. მისი გამორთვა სტანდარტულად შეუძლებელია, ის ძირეულ წვდომას და სისტემურ jar ფაილებს იყენებს — რაც მავნე პროგრამის ნიშნებს ატარებს," — აღნიშნულია უკრაინის დაზვერვის ანგარიშში.

უკრაინაში უკვე დიდი ხანია მიმდინარეობს დისკუსია Telegram-ის შეზღუდვასთან დაკავშირებით. ხელისუფლების შეფასებით, მთავარი საფრთხე პლატფორმაზე ანონიმური ინფორმაციის გავრცელებაა.

ეს პოზიცია კვლავ გააქტიურდა მას შემდეგ, რაც Telegram-ის დამფუძნებელი პაველ დუროვი საფრანგეთში დააკავეს.

უკრაინის უმაღლესი რადას სპიკერმა, რუსლან სტეფანჩუკმა განაცხადა, რომ Telegram-ის შესაძლო დაბლოკვის გადაწყვეტილება მხოლოდ ქვეყნის უსაფრთხოებისთვის იქნება მიღებული.