Practical Magic 2-ზე მუშაობა აქტიურ ფაზაში შედის — 1990-იანების საკულტო ფილმად ქცეული რომანტიკული ფენტეზის გადაღებები სულ ახლახან დაიწყო და ამის შესახებ პირველმა ნიკოლ კიდმანმა გვაცნობა. კიდმანი, სანდრა ბულოკთან ერთად, ისევ მთავარ როლში მოგვევლინება. გადასაღები მოედნიდან გავრცელებულ პირველ კადრებში სწორედ დებ ოუენსებს — კიდმანისა და ბულოკის პერსონაჟებს — ვხედავთ.

"ჯადოქრები ბრუნდებიან — დები ოუენსების პირველი დღე გადასაღებ მოედანზე", — დაწერა კიდმანმა ინსტაგრამზე.

პრაქტიკული მაგია ეკრანებზე 1998 წელს გამოვიდა. რეჟისორ გრიფინ დანის ნამუშევარი ელის ჰოფმანის ამავე სახელწოდების რომანის ეკრანიზაცია გახლავთ. ნაწარმოები ორ ჯადოქარ დაზე, სალი და ჯილიან ოუენსებზე, გვიყვება. ოუენსები ჯადოქრების დიდ შტოს წარმოადგენენ, მაგრამ ადრეულ ასაკში დაობლებული დების ცხოვრების ნაწილია საგვარეულო წყევლაც — ვისაც ოუენსების ქალი შეუყვარდება, უდროო სიკვდილისთვისაა განწირული.

საინტერესო ფაქტი ფილმზე: რეჟისორმა გადაღებებისთვის "ნამდვილი ჯადოქარი" აიყვანა კონსულტანტად, რომელმაც მოგვიანებით დამატებითი ანაზღაურება და ფილმის მოგებიდან წილი მოითხოვა. რადგან ამ მოთხოვნას პროდიუსერებმა უარით უპასუხეს, "ჯადოქარს" პროექტიც და გრიფინ დანიც დაუწყევლია.

პრაქტიკულ მაგიას გამოსვლისთანავე დიდი წარმატება არ მოჰყოლია: $75-მილიონიანი ბიუჯეტის საპირწონედ, ფილმმა მხოლოდ $68,3 მილიონის გამომუშავება შეძლო. თუმცა, დროთა განმავლობაში, ფილმი საკულტო ნაწარმოებად იქცა, რომელიც ჰელოუინის კინომარათონის განუყოფელი ნაწილია.

ფოტო: Warner Bros.

რაც შეეხება გაგრძელებას, პრაქტიკული მაგია 2-ის რეჟისორი სიუზენ ბიერი იქნება, რომელთან ერთადაც კიდმანს უმუშავია ფილმზე The Perfect Couple, ბულოკს კი — თრილერზე Bird Box. ოუენსების ახალი ისტორიის სცენარისტი კვლავაც ოსკაროსანი აკივა გოლდსმენია, კიდმანი და ბულოკი კი პროდიუსერებადაც მოგვევლინებიან.

აღსანიშნავია, რომ პრაქტიკული მაგია 2-ის მსახიობებს შორის არიან დაიან უისტი და სტოკარდ ჩენინგიც, რომლებმაც წინამორბედ ფილმში დები ოუენსების გამზრდელი დეიდები განასახიერეს. თუმცა, ახალ ფილმში ვერ ვიხილავთ ევან რეიჩელ ვუდს, რომელიც პირველ ნაწილში ბულოკის პერსონაჟის შვილს თამაშობდა.

"[ფილმის შემქმნელებს] ჩემი ჩართვაც შევთავაზე, თუნდაც ერთი სცენა ან ერთი წინადადება რომ ყოფილიყო, მაგრამ მითხრეს, რომ სხვა მსახიობს ეძებენ", — განაცხადა ვუდმა, — "ვწუხვარ, რომ ჩემი გულშემატკივრების გაწბილება მიწევს, ჩემზე არ ყოფილა ეს დამოკიდებული. მე სიხარულით შევუერთდებოდი ჩემს დებს".

პრაქტიკული მაგია 2-ის პრემიერა 2026 წლის 18 სექტემბერს შედგება.