ეუთო-ს მინისტრთა საბჭოს 25-ე შეხვედრაზე, საქართველოს მეგობართა ჯგუფის ქვეყნებმა რუსეთ-საქართველოს კონფლიქტთან დაკავშირებით ერთობლივი განცხადება გაავრცელეს. განცხადებაში საუბარია რუსეთის აგრესიულ ქმედებებზე, ოკუპირებულ რეგიონებში მოსახლეობის დისკრიმინაციასა და უფლებების შეზღუდვაზე. ასევე, საერთაშორისო ფორმატების მნიშვნელობასა და მეგობარი ქვეყნების მტკიცე მხარდაჭერის შესახებ.

საქართველოს მეგობართა ჯგუფში შედიან ბულგარეთი, კანადა, ჩეხეთი, ესტონეთი, ლატვია, ლიეტუვა, პოლონეთი, რუმინეთი, შვედეთი, უკრაინა, გაერთიანებული სამეფო და ამერიკის შეერთებული შტატები.

ამ ქვეყნებმა განცხადებაში ისევ დაადასტურეს საქართველოს სუვერენიტეტისა და ტერიტორიული მთლიანობის ურყევი მხარდაჭერა და რუსული ოკუპაცია დაგმეს. ასევე, გამოხატეს მხარდაჭერა ოკუპირებული რეგიონების არაღიარების პოლიტიკისადმი და მოუწოდეს ეუთო-ს მონაწილე ყველა სახელმწიფოს, მოიქცნენ ამგვარად.

მათ დაგმეს არჩილ ტატუნაშვილის, გიგა ოთხოზორიასა და დავით ბაშარულის მკვლელობები და მოუწოდეს რუსეთის ფედერაციას, როგორც საქართველოს აფხაზეთისა და სამხრეთ ოსეთის რეგიონებში ეფექტური კონტროლის განმახორციელებელ სახელმწიფოს, არ შეუქმნას დაბრკოლება გამოძიებას.

ქვეყნებმა ღრმა შეშფოთებას გამოვთქვეს აფხაზეთისა და სამხრეთ ოსეთის რეგიონებში მცხოვრები ეთნიკურად ქართველი მოსახლეობის დისკრიმინაციასა და ადამიანის უფლებების ხელყოფის ფაქტებთან დაკავშირებით. მათ დაგმეს იძულებით გადაადგილებულ პირთა საცხოვრებელი სახლების მასობრივი განადგურების ფაქტები. მათი თქმით, ეს აფხაზეთისა და სამხრეთ ოსეთის რეგიონებში ეთნიკურად ქართველი მოსახლეობისა და კულტურული მემკვიდრეობის კვალის სრული გაქრობისკენ რუსეთის მიზანმიმართული პოლიტიკის გამოხატულებაა.

მათი განცხადებით, შემაშფოთებელია გადასასვლელი პუნქტების დახურვით გამოწვეული შედეგებით. მათივე თქმით, კონფლიქტით დაზარალებულ ადგილებში უსაფრთხოება და ჰუმანიტარული მდგომარეობა კიდევ უფრო უარესდება. მეგობარი ქვეყნები ამბობენ, რომ მისასამლებელია საქართველოს პროგრესი და სამწუხაროა, რომ ამ უპირატესობებით ვერ სარგებლობს საქართველოს აფხაზეთისა და სამხრეთ ოსეთის რეგიონების მოსახლეობა.

მეგობარმა ქვეყნებმა ხაზი გაუსვეს კონფლიქტის მშვიდობიანად მოგვარების საჭიროებას, გაერო-ს ქარტიის, ჰელსინკის დასკვნითი ოქმისა და საერთაშორისო სამართლის ფუნდამენტური ნორმებისა და პრინციპების სრული პატივისცემით. მათ მტკიცე მხარდაჭერა გამოუცხადეს ჟენევის საერთაშორისო მოლაპარაკებების ფორმატს და ინციდენტების პრევენციისა და მათზე რეაგირების მექანიზმს (IPRM). თუმცა, შეშფოთება გამოთქვეს IPRM-ების უკანასკნელი შეხვედრების ჩაშლასთან დაკავშირებით და მოუწოდეს მონაწილეებს, გამონახონ კონფლიქტით დაზარალებული მოსახლეობის უსაფრთხოებისა და ჰუმანიტარული საჭიროებების გადაჭრის შესაბამისი გზები.

მეგობარმა ქვეყნებმა ღრმა შეშფოთება გამოხატეს რუსეთის მიერ გახშირებულ სამხედრო წვრთნებთან და საქართველოს აფხაზეთისა და სამხრეთ ოსეთის რეგიონებში დამატებითი სამხედრო შენაერთების განლაგებასთან დაკავშირებით. მათ ხაზგასმით აღნიშნეს, რომ მავთულხლართებისა და სხვა ხელოვნური ბარიერების აღმართვით საოკუპაციო ხაზის გამაგრების მიმდინარე პროცესი კიდევ უფრო ამძიმებს კონფლიქტით დაზარალებული მოსახლეობის ადგილზე არსებულ ჰუმანიტარულ მდგომარეობას.