ქართული ოცნების მიერ მხარდაჭერილმა საპრეზიდენტო კანდიდატმა, სალომე ზურაბიშვილმა განაცხადა, რომ კანაფის კულტივაციის მსგავსი კანონპროექტები საპატრიარქოს გარეშე არ უნდა წყდებოდეს.

როგორც ზურაბიშვილი ფეისბუქზე წერს, კანონპროექტის გაწვევის გადაწყვეტილება საზოგადოების განწყობასა და მოლოდინებს პასუხობს.

"ეს იყო ის, რაც ჩემ სამთვიანი კამპანიის დროს ყველგან მოვისმინე ხალხისგან, უპირველეს ყოვლისა დედებისგან, საქართველოს ყოველ რეგიონში... მიხარია რომ ამ საერთო დასკვნამდე მივედით, რამეთუ ასეთი საკითხი საზოგადოებისა და საპატრიარქოს გარეშე არ უნდა წყდებოდეს" — წერს ზურაბიშვილი.

პრეზიდენტობის კანდიდატს აქამდე ნათქვამია აქვს, რომ კანაფის ლეგალიზაციის მომხრე არ არის. მისივე თქმით, "ახალგაზრდები უნდა იყვნენ დაცულნი ზოგჯერ თავისი თავის მიმართ".

მაშინ, როცა სალომე ზურაბიშვილს სასულიერო პირები აკრიტიკებდნენ და "კანაფის დედოფალს" უწოდებდნენ, მან განაცხადა, რომ ეკლესია ასეთ დონეზე არ უნდა ერეოდეს საარჩევნო კამპანიაში.

"როგორც პრეზიდენტი, როგორც პასუხისმგებელი ეკლესიის და სახელმწიფოს შორის კონკორდატის შესრულებაზე, მე ამაზე მექნება ძალიან ძლიერი პროტესტი, რადგან ეს არის დარღვევა ყველა იმ შეთანხმების, რაც არსებობს მართლმადიდებელ ეკლესიას და სახელმწიფოს შორის, რომ ჩაერიოს ამ დონით და პირდაპირ ბრალდებებით, ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე", - განაცხადა ზურაბიშვილმა.

კანაფის კონტროლის შესახებ კანონპროექტი

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე აიკრძალება არასამედიცინო მიზნით კანაფის კულტივაციაც.

დოკუმენტი 131 გვერდიანია და დამტკიცების შემდეგ, სულ მცირე 10 კანონში გამოიწვევდა ცვლილებას. კანონპროექტს როგორც ეკლესიიდან, ისე საზოგადოებისგან კრიტიკა მოჰყვა. საქართველოს საპატრიარქომ განცხადება გაავრცელა, სადაც აღნიშნა, რომ სრულიად მართლმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

კანონპროექტის გადავადების გადაწყვეტილება უმრავლესობამ მას შემდეგ მიიღო, რაც აღნიშნულ ინიციატივას საქართველოს მართლმადიდებელი ეკლესია დაუპირისპირდა.

2 ნოემბერს მართლმადიდებელი ეკლესიის პატრიარქთან შეხვედრის შემდეგ პარლამენტის თავმჯდომარემ, ირაკლი კობახიძემ და შს მინისტრმა, გიორგი გახარიამ განაცხადეს, რომ კანაფის კულტივაციის კანონპროექტს მთავრობა უკან გაიწვევდა.

როგორც შემდგომში საპატრიარქომ განაცხადა, მთავრობის ამ გადაწყვეტილებით ისინი კმაყოფილი არიან.

მმართველი გუნდის წარმომადგენლებმა რამდენიმე დღის წინ კანონპროექტის უკან გაწვევა მოითხოვეს. მათი განმარტებით, საპრეზიდენტო არჩევნებში დაბალი შედეგი ერთ-ერთ მიზეზი სწორედ ეს კანონპროექტი იყო.