სასულიერო პირების ნაწილმა, თბილისის საკრებულოსთან პარაკლისი აღავლინა და შინაგან საქმეთა სამინისტროს მიერ კანაფის კონტროლის შესახებ კანონპროექტი კიდევ ერთხელ გააკრიტიკა.

პარაკლისის დასრულების შემდეგ, მრევლს მამა შალვა კეკელიამ მიმართა. მისი თქმით, ეკლესია ორ გადაწყვეტილებას აპროტესტებს: პირველი საკონსტიტუციო სასამართლოს მიერ მარიხუანის მოხმარების ლეგალიზებას ეხება, ხოლო მეორე კანაფის სამედიცინო მიზნებით კულტივაციასა და ექსპორტს.

მამა შალვა კეკელია ფიქრობს, რომ საკონსტიტუციო სასამართლოს 30 ივნისს მიღებული გადაწყვეტილებით პიროვნების თავისუფლების განვითარების უფლებაში მარიხუანას მოხმარება შეიყვანეს.

"ეს თავისთავად საფრთხეების შემცველი გადაწყვეტილებაა. შექმნილი პრეცედენტი კი საშიშროებას ქმნის მომავალში, რომ სასამართლომ სხვა ნარკოტიკები ან ადამიანის ჯანმრთელობისთვის საზიანო რაიმე ქმედებები იგივე ლოგიკით დააკანონოს", - განაცხადა შალვა კეკელიამ.

მისივე თქმით, კანაფის სამედიცინო მიზნით ექსპორტის შესახებ კანონპროექტი გასაიდუმლოებულად შეიმუშავეს და უმრავლესობის აზრის გათვალისწინების გარეშე აპირებენ დამტკიცებას.

"მოსახლეობას ამ კანონის მიმართ რა დამოკიდებულება აქვს, არ აინტერესებთ. მოვუწოდებთ, რომ ეს კანონი ასე არ იყოს მიღებული, რადგან ავნებს ჩვენს ქვეყანას. ჩვენს სამშობლოს არ სჭირდება კაზინოებით, ნარკოტიკებით შემოსული ფული", - თქვა მამა შალვა კეკელიამ.

მან საკრებულოს წინ სასულიერო პირების მიერ შემუშავებული "ორი გამოსავალი" წაიკითხა.

  • კონსტიტუციის შესაბამის მუხლში შევიდეს ისეთი ცვლილება, რომ თვითგანვითარება არ გულისხმობდეს თვითდამაზიანების ქმედებას.
  • არ მოხდეს კანონის იმ ნაწილის მიღება, სადაც მარიხუანას ლეგალურ კულტივაციაზეა საუბარი.

"ჩვენ ამას არ შევეგუებით, ეს ჩვენთვის, სასულიერო პირებისთვის, და იმ ჯანსაღი ნაწილისთვის, რომელსაც თავისი ქვეყანა უყვარს და რომელმაც ეს ხელისუფლება, არ არის მისაღები. ამ კანონს მოსახლეობა არ შეეგუება", - განაცხადა მამა შალვა კეკელიამ.

მან მოუწოდა სასულიერო პირებსა და მრევლს ხვალ, 16 სექტემბერს სამებაში პატრიარქის წირვას დაესწრონ, რადგან ეს თავად პატრიარქის თხოვნაა.

თბილისის საკრებულოსთან პარაკლისის გადახდამდე, საპატრიარქოში საგანგებო თათბირი დაინიშნა.

კურიერის ინფორმაციით, საგანგებო შეხვედრის მიზანი კანაფის კულტივაციასა და ექსპორტთან დაკავშირებით მთავრობის ინიციატივა იყო.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგენ ხელისუფლებას და განაცხადეს, რომ მზად არიან აჩვენონ საკუთარი ძალა.

მეუფე იაკობი ხელისუფლებას დაემუქრა და განაცხადა, რომ ქვეყნის ღალატს არავინ აპატიებს. მეუფე ანტონიმ კი ტოკ-შოუ რეაქციაში "სანთლების რევოლუცია" დააანონსა.