პარტია ქართული ოცნების მიერ მხარდაჭერილი საპრეზიდენტო კანდიდატის, სალომე ზურაბიშვილის განცხადებით, ის მარიხუანის ლეგალიზაციის მომხრე არაა და არც არასდროს იქნება. მისივე თქმით, ახალგაზრდები ამ კუთხით ზოგჯერ საკუთარი თავისგან უნდა დაიცვან.

"საქართველოს სხვა რეგიონშიც, ასევე სამწუხაროდ, არის ეს საკითხი ძალიან მტკივნეული — ეს არის მარიხუანას, ნარკოტიკების საკითხი. მე მინდა თქვენ გითხრათ, მე არ ვარ და არასოდეს ვიქნები ლეგალიზაციის მომხრე. მე ვარ დედა და ბევრი დედა მოვიდა ჩემთან ამ საკითხით და მე სრულიად ვიზიარებ ამ კუთხით ძალიან დიდ მწუხარებას, რომ შეიძლება ეს სხვანაირად იყოს გამოყენებული, სხვანაირად გაგებული ახალგაზრდების მიერ", — განაცხადა ზურაბიშვილმა მარნეულში ამომრჩევლებთან შეხვედრისას.

მარიხუანის მოხმარების ლეგალიზაცია და კანაფის კულტივაციის კანონპროექტი

2018 წლის 30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რითაც მარიხუანის მოხმარებისთვის ადმინისტრაციული სასჯელის გააუქმა. სასამართლოს ამ შემთხვევაში არ უმსჯელია მარიხუანის მოპოვების გზებზე. შესაბამისად, შეძენა-შენახვა-კულტივაცია და რეალიზაცია კვლავ დასჯადია.

მიმდინარე წლის 12 სექტემბერს შინაგან საქმეთა სამინისტრომ მარიხუანის მოხმარებისა და სამედიცინო მიზნით ექსპორტზე გასატანად კანაფის კულტივაციის რეგულირებისთვის ახალი კანონპროექტი შექმნა. საქართველოს საპატრიარქომ რადიკალური განცხადებები გააკეთა და ხელისუფლებას შეეწინააღმდეგა. ისინი საკონსტიტუციო სასამართლოს მიერ მარიხუანის მოხმარების ლეგალიზებასა და სამედიცინო მიზნებით კულტივაციას ეწინააღმდეგებოდნენ. მთავრობამ კულტივაციის კანონპროექტის განხილვა 2 თვით გადაავადა.

სალომე ზურაბიშვილმა 16 სექტემბერს P.S-ისთვის მიცემულ ინტერვიუში განაცხადა, რომ იზიარებს საპრიარქოს პოზიციას მარიხუანის მოხმარების ლეგალიზაციის შესახებ:

"ჩვენ უნდა დავიცვათ ჩვენი ახალგაზრდები და მათი ჯანმრთელობა. მე ამაში სრულიად ვეყრდნობი საპატრიარქოს, რომ უნდა იყოს დაცული", - აღნიშნა ზურაბიშვილმა.