პერუს საგადასახდო დეპარტამენტის აგენტები ლიმაში მოსაკ ფონსეკას წარმომადგენლის ბინაში შევიდნენ და ჩხრეკისას სხვადასხვა დოკუმენტები ამოიღეს.

სააგენტოს წარმომადგენლების განცხადებით, აღნიშნული ოპერაცია გამოძიების ნაწილია, რომელიც მოსაკ ფონსეკასა და პერუს მოქალაქეების კავშირს ეხება, გადასახადების დამალვის საქმეში.

წინა კვირას პერუს საბაჟო და საგადასახადო სააგენტომ გამოძიება ახლიდან დაიწყო იმ ადამიანებისა და კომპანიების საქმიანობაზე, რომლებიც გადასახადების დამალვაში ადრეც იყვნენ ეჭვმიტანილები. მათი მონაცემები პანამის დოკუმენტებთან შედარდება და გამოძიება შესაბამის დასკვნას გამოიტანს.

მსოფლიოს 400-მდე ჟურნალისტისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად.