რუსეთის პატრიარქის პრესმდივნის, ალექსანდრ ვოლკოვის განცხადებით, კონსტანტინოპოლის გადაწყვეტილება კატასტროფულ შედეგს გამოიღებს, განსაკუთრებით უკრაინისთვის.

"ეს არის ტრადიციებისა და ეკლესიურობის აღქმის სრული გახლეჩა და, რა თქმა უნდა, რასაც ახლა კონსტანტინოპოლი აკეთებს, კატასტროფულ შედეგებს გამოიწვევს, პირველ რიგში, უკრაინელი მართლმადიდებლებისთვის. რადგან ახლა რაღაც საშინელი დაიწყება", - ამის შესახებ ვოლკოვმა ტელეარხ სპასში განაცხადა.

11 ოქტომბერს ცნობილი გახდა, რომ კონსტანტინოპოლის წმინდა სინოდმა უკრაინის ეკლესიის ავტოკეფალიის მინიჭების პროცესი დაიწყო. სინოდის განცხადების თანახმად, გაუქმდა 1686 წელს სინოდის მიერ მიღებული გადაწყვეტილება, რომელიც მოსკოვის საპატრიარქოს ნებას რთავდა კიევის სამიტროპოლია საკუთარ დაქვემდებარებაში მოექცია.

აღნიშნული გადაწყვეტილება ალექსანდრ ვოლკოვმა ეკლესიის ისტორიის უხეშ დამახინჯებად შეაფასა.

უკრაინის ეკლესიის ავტოკეფალიის საკითხი

უკრაინის ეკლესიისთვის ავტოკეფალიის მინიჭების საკითხი მსოფლიო პატრიარქსა და რუსეთის საპატრიარქოს შორის განხეთქილების მიზეზად იქცა.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა და უმაღლესმა რადამ.

მსოფლიო პატრიარქი ბართლომე ამბობდა, რომ უკრაინა ავტოკეფალიას მალე მიიღებს, რადგან ეს მისი უფლებაა.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

კიევის პატრიარქ ფილარეტს ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. მიუხედავად ამისა, საქართველოს საპატრიარქო უკრაინის ეკლესიისთვის ავტოკეფალიის მინიჭების საკითხზე საჯარო პოზიციას აქამდე არ აფიქსირებს.