საქართველოს საგარეო საქმეთა სამინისტრომ 4 ქვეყანაში საქართველოს საგანგებო და დიპლომატიური ელჩების კანდიდატურები წარადგინა, მათ შორისაა საგარეო საქმეთა მინისტრის მოადგილე დავით დონდუა.

დონდუა ავსტრიის რესპუბლიკაში საქართველოს საელჩოს, ასევე ევროპის უსაფრთხოებისა და თანამშრომლობის ორგანიზაციასა და ქ. ვენაში განლაგებულ სხვა საერთაშორისო ორგანიზაციებში საქართველოს მუდმივი წარმომადგენლის თანამდებობებზეა წარდგენილი.

თურქეთის რესპუბლიკაში საქართველოს საგანგებო და სრულუფლებიანი ელჩის თანამდებობაზე წარდგენილია გიორგი ჯანჯაღავა. 2018 წლის პირველ ოქტომბრამდე ის იკავებდა საუდის არაბეთის სამეფოში საქართველოს საგანგებო და სრულუფლებიანი ელჩის და ისლამური თანამშრომლობის ორგანიზაციაში (OIC) საქართველოს წარმომადგენლის პოზიციას.

იორდანიის ჰაშიმიტურ სამეფოში წარდგენილია ზაზა კანდელაკი, რომელიც 2018 წლის 1 ოქტომბრამდე უნგრეთში საქართველოს საგანგებო და სრულუფლებიანი ელჩი იყო. ხოლო ლატვიის რესპუბლიკაში წარდგენილია თეა მაისურაძე, რომელიც 2016 წლის აპრილიდან დღემდე საქართველოს საგარეო საქმეთა სამინისტროს საერთაშორისო ორგანიზაციების დეპარტამენტის დირექტორი იყო.

კანდიდატების საქართველოს პრეზიდენტისთვის წარდგენის თაობაზე განკარგულებას ხელი მოაწერა საქართველოს პრემიერ მინისტრმა, მამუკა ბახტაძემ. დღეს, 5 ოქტომბერს ელჩების კანდიდატურებს საქართველოს პრეზიდენტი მიიღებს.