თბილისის საქალაქო სასამართლომ ინტერნეტ-ტოტალიზატორის, Crystalbet-ის მენეჯერს ჯეკპოტის მითვისებისთვის რვაწლიანი პატიმრობა მიუსაჯა.

პროკურატურის ინფორმაციით, კომპანია წახალისებისთვის მომხმარებლებს სთავაზობდა სხვადასხვა აქციას, მათ შორის, ჯეკპოტის გათამაშებას აზარტული თამაშების ყველა სახეობაში. ჯეკპოტის გათამაშების ფუნქცია კი დაეკისრა ბრალდებულს, რომელმაც სამსახურებრივი მდგომარეობის გამოყენებით Crystalbet-ის კუთვნილი დიდი ოდენობით თანხას წინასწარ შემუშავებული თაღლითური სქემით მიისაკუთრა.

როგორც განცხადებაში წერია, მენეჯერსა და სხვა პირებს 2016 წლის სექტემბრის თვიდან კომპანიის მიერ ორგანიზებულ ონლაინ სამაგიდო თამაშებში მონაწილეობის იმიტაციისთვის, ანგარიშებზე შეჰქონდათ მინიმალური თანხები. პროკურატურა განმარტავს, რომ თაღლითურ სქემაში მონაწილე ყველა პირი წინასწარ იყო გაფრთხილებული, თუ კონკრეტულად დროის რომელ მონაკვეთში გათამაშდებოდა ჯეკპოტი, რაც კანონის მიხედვით, მათთვის არ უნდა ყოფილიყო ცნობილი.

უწყების თქმით, ამ სქემით დაუფლებული თანხები ბრალდებული მენეჯერის მითითებით ირიცხებოდა სხვადასხვა პირის სახელზე დამზადებულ საბარათე ანგარიშებზე, რომლებსაც თვითონ განკარგავდა. საერთო ჯამში, თაღლითური სქემით კომპანიას მიადგა 1 208 981,84 ლარის ქონებრივი ზიანი.

სამართალდამცველებმა მენეჯერი 2018 წლის 8 იანვარს დააკავეს. მას საქართველოს მთავარმა პროკურატურამ ბრალდება სისხლის სამართლის კოდექსის 180-ე მუხლის მეორე ნაწილის "ა" ქვეპუნქტით და მესამე ნაწილის "ა" და "ბ" ქვეპუნქტებით (თაღლითობა, წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, დიდი ოდენობით) წარუდგინა და აღკვეთის ღონისძიების სახით პატიმრობა შეეფარდა.