საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანასგან წარმოებული მედიკამენტების ექსპორტზე გატანას გულისხმობს. ამის შესახებ ინფორმაცია On.ge-ს ჯანდაცვის კომიტეტის თავმჯდომარემ აკაკი ზოიძემ დაუდასტურა.

აკაკი ზოიძის განმარტებით, აღნიშნული ინიციატივა მმართველმა გუნდმა 10 სექტემბრის უმრავლესობის სხდომაზე განიხილა.

"სამედიცინო მიზნით ექსპორტის ლიცენზიაზე იყო მსჯელობა, მაგრამ, საბოლოოდ, სანამ არ იქნება კანონპროექტი ვერ დაგიდასტურებთ, რომ ეს ინიციატივა კანონპროექტის საბოლოო ვერსიაში აისახება", — განაცხადა აკაკი ზოიძემ.

ის ამბობს, რომ ინიციატივა მარიხუანას მოხმარების შემზღუდველ კანონპროექტთან ერთად მთავრობის სხდომაზე იქნება წარდგენილი.

"მე ზოგადად სამედიცინო მიზნით, სამედიცინო პრეპარატების წარმოების მომხრე ყოველთვის ვიყავი. ეს იქნება მორფინი, ტკივილგამაყუჩებელი თუ ანტიდეპრესანტი. ვერანაირ პრობლემას ვერ ვხედავ. აქ საუბარია, კიდევ ერთხელ ვიმეორებ, ექსპორტზე, გატანაზე, რომელიც შეიძლება იყოს ძალიან დიდი შემოსავლის წყარო ქვეყნისთვის. მაგრამ საუბარია მხოლოდ და მხოლოდ სამედიცინო და კოსმეტიკური მიზნებით იმ პროდუქტების გატანაზე, რომელიც იწარმოება კანაფიდან", — ამბობს აკაკი ზოიძე.

დეპუტატის განმარტავს,რომ შსს-ს მიერ მომზადებულ საკანონმდებლო ინიციატივაში საუბარი უნდა იყოს ორი მიმართულებით, მათ შორის მოხმარების შეზღუდვებსა და მკაცრ რეგლამენტირებაზე.

"ჩვენ ვერ დავუჭერთ მხარს, ყოველ შემთხვევაში, მე პირადად, დანარჩენი პარლამენტის გადასაწყვეტია, რომ მარიხუანა რეკრეაციული მოხმარებისთვის იწარმოებოდეს. ამის ლეგალიზაციას ჩვენ მხარს არ დავუჭერთ. მაგრამ საექსპორტო-სამედიცინო მიზნით, მე პირადად მხარს დავუჭერდი. დანარჩენს მთავრობა და პარლამენტი გადაწყვეტს, როცა კანონპროექტი საბოლოო სახეს მიიღებს", — ამბობს აკაკი ზოიძე.

შინაგან საქმეთა სამინისტროში ადასტურებს, რომ განიხილავენ ექსპორტზე გასატანად სამედიცინო და კოსმეტიკური მიზნით მარიხუანის მოყვანა-წარმოების საკითხს.

"ნებისმიერ შემთხვევაში ქვეყნის შიგნით მარიხუანას გასაღება რჩება დასჯადი სისხლის სამართლის წესით", — განუმარტეს On.ge-ს შსს-ში.

მასალა აღნიშნულ თემაზე თავდაპირველად ინტერპრესნიუსმა გაავრცელა.

მარიხუანის მიერ დამზადებული სამედიცინო მედიკამენტების მოხმარება ლეგალურია მსოფლიოს არაერთ ქვეყანაში, მათ შორისაა დიდი ბრიტანეთი, ავსტრალია, ნიდერლანდები, აშშ-ს ზოგიერთი შტატი, კანადა, ურუგვაი, ისრაელი და პორტუგალია.

გაიგე მეტი: