შინაგან საქმეთა სამინისტროს ინფორმაციით, გვიან ღამით თბილისში, წერეთლის გამზირზე პატრულ-ინსპექტორისთვის წინააღმდეგობის გაწევისა და ჯანმრთელობის დაზიანების ბრალდებით რამდენიმე პირი დააკავეს.

შსს-ს ინფორმაციით:

  • პატრულის თანამშრომლებმა დინამო-არენასთან რამდენიმე პირი შენიშნა, რომლებსაც ერთმანეთთან კონფლიქტი ჰქონდა, პოლიციელებმა კი წესრიგის დაცვისკენ მოუწოდეს. ორმა პირმა პოლიციის მოთხოვნა არ შეასრულა, წინააღმდეგობა გაუწიეს, სამსახურეობრივი მოვალეობის დროს ხელი შეუშალეს და სიტყვიერი შეურაცხყოფა მიაყენეს;
  • ამავე ინციდენტში მონაწილე სამი სხვა პირი პოლიციელის მოთხოვნის დაუმორჩილებლობისა და წვრილმანი ხულიგნობისთვის დააკავეს.

პირველ შემთხვევაში საქმე სისხლის სამართლის კოდექსის 353-ე მუხლის მეორე ნაწილით მიმდინარეობს. ამ მუხლით პოლიციის მუშაკის მიმართ ჯგუფურად წინააღმდეგობის გაწევა ისჯება თავისუფლების აღკვეთით ვადით ოთხიდან შვიდ წლამდე.

მეორე შემთხვევაში კი ადმინისტრაციულ სამართალდარღვევათა კოდექსის 163-ე და 177-ე მუხლებით. ამ მუხლებით პირს ადმინისტრაციული პასუხისმგებლობა წვრილმანი ხულიგნობისა და პოლიციელის მოთხოვნის დაუმორჩილებლობისთვის ეკისრება.